पाचवेळा आमदार, तरीही पक्षातच ‘उपरे’ ठरविले गेले; वाचा, प्रकाश भारसाकळेंचा संघर्ष

अकोला जिल्ह्यातल्या अकोट विधानसभा मतदारसंघाचे आमदार प्रकाश भारसाकळे यांच्या मुलाला जीवे ठार मारण्याची धमकी देण्यात आली आहे. (read unknown facts about mla prakash bharsakale)

भीमराव गवळी | Updated on: Mar 07, 2021 | 5:18 PM

मुंबई: अकोला जिल्ह्यातल्या अकोट विधानसभा मतदारसंघाचे आमदार प्रकाश भारसाकळे यांच्या मुलाला जीवे ठार मारण्याची धमकी देण्यात आली आहे. एका अज्ञात व्यक्तिने भारसाकळेंच्या घरी पत्र पाठवून पाच कोटींची खंडणी मागितली आहे. त्यामुळे भारसाकळे चर्चेत आले आहेत. आपल्याच पक्षात उपरे ठरविल्या गेलेले भारसाकळे कोण आहेत? पक्षातच त्यांना संघर्ष का करावा लागला? याचा घेतलेला हा आढावा. (read unknown facts about mla prakash bharsakale)

कौटुंबीक पार्श्वभूमी

प्रकाश गुणवंतराव भारसाकळे हे अमरावतीच्या दर्यापूर तालुक्यातील बनोसा येथील शिवाजी नगरात राहतात. दहावी नापास असलेले 64 वर्षीय भारसाकळे हे व्यवसायाने शेतकरी आहेत. अकोट हा त्यांचा मतदारसंघ असून भाजपचे ज्येष्ठ नेते आहेत. यांच्या पत्नी ह्या सुद्धा दर्यापूर नगरपालिकेच्या नगराध्यक्ष आहेत. तर त्यांचा मुलगा जिनिंग प्रेसिंगचा कारभार सांभाळतो.

शिवसेनेपासून राजकीय कारकिर्दीस सुरुवात

भारसाकळे यांच्या राजकीय इनिंगला शिवसेनेतून सुरुवात झाली. त्यांच्या राजकारणाचा श्रीगणेशाही गावपातळीवरील राजकारणापासून झाली. त्यांनी पंचायतराज समितीचं अध्यक्ष म्हणूनही काम केलं आहे. भारसाकळे हे 1990, 1995, 1999, 2004 मध्ये सलग शिवसेनेच्या तिकिटावर अमरावती जिल्ह्यातील दर्यापूर मतदारसंघातून विजयी झाले होते.

राणेंचं बंड आणि काँग्रेस

माजी मुख्यमंत्री नारायण राणे यांनी शिवसेनेत बंड केलं. त्यानंतर त्यांनी काँग्रेसमध्ये प्रवेश केला. 2005 मध्ये भारसाकळे यांनीही राणेंसोबत काँग्रेसमध्ये प्रवेश केला. पण काँग्रेसमध्ये ते जास्त काळ रमले नाहीत. 2009 च्या निवडणुकीत दर्यापूर अनुसुचित जातीसाठी राखीव झाल्यानंतर काँग्रेसने त्यांना अकोटमधून तिकीट नाकारलं. त्यामुळे नाराज झालेल्या भारसाकळेंनी बंड पुकारलं आणि अकोटमधून अपक्ष निवडणूक लढवली होती.

भाजपमध्ये प्रवेश

काँग्रेसने तिकीट नाकारल्यानंतर अपक्ष म्हणून निवडणूक लढवावी लागलेल्या भारसाकळेंनी भाजपमध्ये प्रवेश केला. 2014च्या निवडणुकीत भाजपने त्यांना तिकीट दिलं आणि ते विजयीही झाले. 2014 च्या विधानसभा निवडणुकीत प्रकाश भारसाकळे 32 हजार मतांनी विजयी झाले होते.

पक्षातच उपरे

2019च्या निवडणुकीत पक्षाकडून तिकीट मिळवण्यासाठी भारसाकळेंना प्रचंड संघर्ष करावा लागला. कारण भाजपमधील अकोटच्याच काही पदाधिकाऱ्यांनी त्यांना उपरे ठरवून त्यांच्याविरोधात बंड पुकारलं होतं. भारसाकळेंनी मागच्या पाच वर्षांत मतदार संघाकडे दुर्लक्ष केल्याचा आरोपही या कार्यकर्त्यांनी केला होता. ते निष्क्रिय असल्याचा आरोपही करण्यात आला होता. त्यामुळे भारसाकळेंना तिकीट मिळणार की नाही? याबाबत शंका निर्माण झाली होती. तिकीट मिळविण्यासाठी त्यांना जंगजंग पछाडावा लागलं होतं. अखेर या सर्वांवर मात करत त्यांना तिकीट मिळालं.

धमकीचं पत्रं

20 फेब्रुवारीच्या दरम्यान प्रकाश भारसाकळे यांच्या दर्यापूर येथील निवासस्थानी एका अज्ञात बिहारी नामक व्यक्तीने हिंदीमध्ये पत्र पाठवून पाच कोटी रुपये 28 फेब्रुवारीपर्यंत देण्यात यावी, अशी धमकी दिली. पैसे द्या अन्यथा तुमच्या मुलाला जीवे मारू, अशी धमकी त्या पत्रात देण्यात आली आहे. या पत्राच्या आधारे 21 फेब्रुवारी रोजी दर्यापूर पोलीस स्टेशनला अज्ञात व्यक्तीच्या विरोधात गुन्हा दाखल करण्यात आलाय. (read unknown facts about mla prakash bharsakale)