Bakri Eid 2023 : देशभरात बकरी ईद साजरी, असे आहे या दिवशी कुर्बानीचे महत्त्व

मुंबई : आज देशभरात बकरी ईद (Bakra Eid 2023) सण मोठ्या उत्साहात साजरा केला जात आहे. याला ईद-उल-अजहा असेही म्हणतात. ईदच्या नमाजानंतर बकरीची कुर्बानी देण्याची प्रथा आहे. बकरी ईदला कुर्बानी देण्याला विशेष महत्त्व आहे. बळी दिलेल्या प्राण्याच्या मांसाचे तीन भाग केले जातात. एक भाग स्वतःसाठी, एक नातेवाईकांसाठी आणि एक गरिबांसाठी दिला जातो. कुर्बानी ही मांसाचे  भाग व्यवस्थित वाटल्यानंतरच वैध मानले जाते. आज बकरी ईद आणि आषाढी एकादशी (Aashadhi Ekadashi 2023) एकत्रच आली असल्याने अनेक शहरात कुर्बानी न देण्याचा निर्णय मुस्लिम समाजाच्या वतीने घेण्यात आला. ही कुर्बानी उद्या देण्यात येणार आहे.

बलिदानाची परंपरा कशी सुरू झाली?

इस्लामिक मान्यतांनुसार, इस्लामचे प्रेषित हजरत इब्राहिम वयाच्या 80 व्या वर्षी वडील झाले. त्याच्या मुलाचे नाव इस्माईल होते. वडील हजरत इब्राहिम यांचे इस्माईलवर खूप प्रेम होते. दरम्यान, हजरत इब्राहिम यांना एका रात्री स्वप्न पडले की त्यांना आपल्या प्रिय वस्तूचा त्याग करावा लागेल. इस्लामिक तज्ञ सांगतात की हजरत इब्राहिमसाठी हा अल्लाहचा आदेश होता, त्यानंतर हजरत इब्राहिम यांनी आपल्या मुलाचा बळी देण्याचा निर्णय घेतला.

इस्लामिक मान्यतेनुसार, अल्लाहच्या आदेशानुसार पुत्र इस्माईलचा बळी देण्यापूर्वी हजरत इब्राहिम यांनी जड अंतःकरणाने डोळे बंद केले आणि त्याच्या गळ्यावर चाकू ठेवला. मात्र, त्यांनी गळ्यावरून चाकू फिरवताच अचानक मुलगा इस्माईल यांच्याऐवजी एक बकरी तिथे आली. हजरत इब्राहिम यांनी डोळ्याची पट्टी काढली तेव्हा त्यांचा मुलगा इस्माईल सुरक्षित होता.

ही केवळ अल्लाहने घेतलेली परीक्षा होती, असा इस्लामिक विश्वास आहे. अल्लाहच्या आदेशानुसार हजरत इब्राहिम आपल्या मुलाचीही कुर्बानी देण्यास तयार झाले. अशा प्रकारे पशुबलिदानाची ही परंपरा सुरू झाली.  दरवर्षी बकरीदची तारीख धुल हिज्जा महिन्यात चंद्र दिसण्यावर अवलंबून असते. इस्लामिक कॅलेंडरनुसार, धूल हिज्जा हा इस्लामचा 12 वा महिना आहे.