ICC U-19 World Cup: वर्ल्ड चॅम्पियन टीमचा अहमदाबादमध्ये होणार सन्मान, BCCI ची घोषणा

अहमदाबाद: पाचव्यांदा अंडर 19 वर्ल्डकप स्पर्धेचे जेतेपद (ICC Under 19 World Cup 2022) पटकावणाऱ्या भारताच्या युवा संघावर सध्या बक्षिसांचा वर्षाव सुरु आहे. रविवारी बीसीसीआयने (BCCI) वर्ल्डकप विजेत्या संघातील प्रत्येक खेळाडूला 40 लाखाचे तर सपोर्ट स्टाफमधील प्रत्येक सदस्याला 25 लाख रुपये इनाम म्हणून देणार असल्याचं जाहीर केलं आहे. आता बीसीसीआयने वर्ल्डकप विजेत्या यश धुलच्या संघाचा अहमदाबादमध्ये सन्मान करणार असल्याचं जाहीर केलं आहे. भारताच्या युवा संघाने शनिवारी फायनलमध्ये (India U19 vs England U19) इंग्लंडला नमवलं. गयानामधील भारताच्या उच्चायुक्तांनी युवा विजेत्या संघाची भेट घेतली. विजयानंतर अंडर 19 टीमने मैदानावर जल्लोष केला. पण आता रविवारी संध्याकाळी यश धुलचा संघ मायदेशी निघण्यासाठी परतीचा प्रवास सुरु करणार आहे. एम्सटर्डम आणि बेंगळुरुमार्गे टीम अहमदाबादमध्ये पोहोचणार आहे.

भारताचा सीनियर संघ सध्या अहमदाबादमध्ये वेस्ट इंडिज विरुद्ध वनडे मालिका खेळतोय. अंडर 19 च्या टीमला वरिष्ठ खेळाडूंसोबत संवाद साधायला मिळणार की, नाही हे अजून स्पष्ट नाहीय. “मुलांचं वेळापत्रक खूप व्यस्त होतं. त्यांना आराम करण्यासाठीही पुरेसा वेळ मिळाला नाही” असं बीसीसीआयच्या पदाधिकाऱ्याने सांगितलं.

No one is taking the trophy away from the India captain ?#U19CWC | #ENGvIND pic.twitter.com/GvYVAqMRQG

— ICC (@ICC) February 5, 2022

फायनल जिंकल्यानंतर भारताची अंडर 19 टीम अँटिंग्वावरुन गयानाला रवाना झाली आहे. तिथे भारताचे उच्चायुक्त केजे श्रीनिवासन यांनी टीमला सन्मानित केलं. थकलेले असतानाही भारताच्या युवा खेळाडूंनी कार्यक्रमात उपस्थित असलेले वेस्ट इंडिजचे महान वेगवान गोलंदाज कर्टली एम्ब्रोस यांच्यासोबत फोटो काढले.