IPL 2026 Points Table : लखनौला पराभूत करत राजस्थान टॉप 2 मध्ये, आरसीबीला मोठा झटका
IPL 2026 Points Table : राजस्थान रॉयल्सने आयपीएल 2026 स्पर्धेत लखनौ सुपर जायंट्सला पराभूत करत एकूण पाचवा सामना जिंकला. राजस्थानच्या या विजयानंतर पॉइंट्स टेबलमध्ये आरसीबीला फटका बसला आहे.
राजस्थान रॉयल्सने रियान पराग याच्या नेतृत्वात आयपीएल स्पर्धेच्या 19 व्या मोसमात (IPL 2026) सलग 4 सामने जिंकून चाबूक सुरुवात केली. मात्र विजयी चौकारानंतर राजस्थानची गाडी विजयाच्या ट्रॅकवरुन घसरली. राजस्थानला सलग 2 सामने गमवावे लागले. राजस्थानचा 22 एप्रिलला लखनौ सुपर जायंट्स विरुद्ध सामना झाला. लखनौनेही सलग 3 सामने गमावले होते. त्यामुळे लखनौसमोर राजस्थान विरूद्धच्या सामन्यात 22 एप्रिल रोजी सलग चौथा पराभव टाळण्याचं आव्हान होतं. मात्र लखनौ घरच्या मैदानात हे आव्हान पेलण्यात अपयशी ठरली. लखनौला एकाना स्टेडियममध्ये 160 धावांचा पाठलाग करताना 18 ओव्हरमध्ये ऑलआऊट 119 रन्सच करता आल्या. राजस्थानने अशाप्रकारे 40 धावांच्या मोठ्या फरकाने हा सामना जिंकला. राजस्थानला या विजयानंतर पॉइंट्स टेबलमध्ये फायदा झाला आहे. या सामन्यानंतर राजस्थानने किती मोठी झेप घेतलीय? हे जाणून घेऊयात.
राजस्थानची टॉप 2 मध्ये एन्ट्री
राजस्थानने लखनौला पराभूत करत पॉइंट्स टेबलमधील टॉप 2 मध्ये धडक दिली आहे. राजस्थानला विजयामुळे पॉइंट्स टेबलमध्ये 2 स्थानांचा फायदा झाला आहे. राजस्थानने चौथ्या क्रमांकावरुन दुसऱ्या स्थानी झेप घेतली आहे. राजस्थानच्या विजयामुळे रॉयल चॅलेंजर्स बंगळुरु आणि सनरायजर्स हैदराबादची पिछेहाट झाली आहे. या दोन्ही संघांना 1-1 स्थानने नुकसान झालं आहे. राजस्थान-लखनौ सामन्याआधी हैदराबाद दुसऱ्या तर आरसीबी तिसऱ्या स्थानी होती.
राजस्थान दुसरीच टीम
राजस्थानला विजयामुळे नेट रनरेटमध्येही फायदा झाला आहे. ताज्या आकडेवारीनुसार, राजस्थानचा नेट रनरेट हा आता +0.790 असा आहे जो सामन्याआधी +0.599 असा होता. राजस्थानच्या खात्यात आता 7 सामन्यानंतर 10 गुण झाले आहेत. राजस्थान रॉयल्स 5 सामने जिंकणारी या मोसमातील दुसरी टीम ठरली आहे. राजस्थानआधी पंजाबने 5 सामने जिंकण्याची कामगिरी करुन दाखवली आहे.
लखनौला फटका
तर लखनौ पराभवानंतरही नवव्या स्थानी कायम आहे. मात्र लखनौला या पराभवाचा नेट रनरेटमध्ये फटका बसला आहे. लखनौचा हा 7 सामन्यानंतर पाचवा पराभव ठरला, त्यामुळे त्यांचा नेट रनरेट हा -1.277 असा झालाय.लखनौचा नेट रनरेट सामन्याआधी -1.173 असा होता.
पंजाब टेबल टॉपर
दरम्यान पंजाब किंग्स पॉइंट्स टेबलमध्ये पहिल्या स्थानी कायम आहे. पंजाब या मोसमातील एकमेव अजिंक्य टीम आहे. पंजाबने 6 पैकी 5 सामने जिंकले आहेत. तर पंजाबचा केकेआर विरुद्धचा सामना हा पावसामुळे रद्द करण्यात आला. त्यामुळे दोन्ही संघांना प्रत्येकी 1-1 गुण देण्यात आला. त्यामुळे पंजाबच्या खात्यात 11 गुण आहेत.
