IPL 2026, RCB vs SRH : सनरायझर्स हैदराबाद की रॉयल चॅलेंजर्स बंगळुरू! विराट कोहली वचपा काढणार?
आयपीएल 2026 स्पर्धेतील पहिला सामना सनरायझर्स हैदराबाद आणि रॉयल चॅलेंजर्स बंगळुरू यांच्यात होत आहे. हा सामना अतितटीचा होणार यात काही शंका नाही. कारण तशी आकडेवारीच आहे. चला जाणून घेऊयात कोण बाजी मारेल ते
IPL 2026, RCB vs SRH: आयपीएल स्पर्धेतील पहिला सामना गतविजेता रॉयल चॅलेंजर्स बंगळुरू आणि सनरायझर्स हैदराबाद यांच्यात होत आहे. दोन्ही संघातील खेळाडू पाहिले तर हा सामना रोमांचक होईल असं दिसत आहे. हा सामना बंगळुरूच्या एम चिन्नास्वामी स्टेडियममध्ये होत आहे. त्यामुळे या सामन्याचं महत्त्व आणखी वाढलं आहे. रॉयल चॅलेंजर्स बंगळुरूचं हे होमग्राउंड आहे. पण असं असलं तरी सनरायझर्स हैदराबादचं पारडं तुलनेनं अधिक वजन आहे. कारण जोश हेझलवूडची उणीव आरसीबी संघाला प्रकर्षाने जाणवणार आहे. तर यश दयाल खेळत नाही. मागच्या आयपीएल स्पर्धेतही सनरायझर्स हैदराबादने आरसीबीला 42 धावांनी पराभूत केलं होतं. मागच्या पर्वात हा एकमेव सामना झाला होता. यात इशान किशनने तोडफोड केली होती. त्याने 5 षटकारांच्या जोरावर 94 धावांची खेळी केली होती. तर अभिषेक शर्माने 17 चेंडूत 34 धावा केल्या होत्या. हैदराबादने 20 षटकात 231 धावा केल्या आणि आरसीबीला 189 धावांवर रोखलं. त्यामुळे त्या पराभवाचा वचपा हैदराबाद काढणार का?
कोणाचं पारडं जड?
आयपीएल स्पर्धेत सनरायझर्स हैदराबादचा संघ आरसीबीपेक्षा भारी ठरला आहे. आतापर्यत या दोन्ही संघात 25 सामने खेळले गेले आहेत. त्यात सनरायझर्स हैदराबादने 14, तर रॉयल चॅलेंजर्स बंगळुरूने 11 सामने जिंकले आहेत. यंदा आरसीबी आणि सनरायझर्स हैदाबात यांच्यात दोन सामने होणार आहे. 28 मार्च आणि 22 मे रोजी हे दोन्ही संघ भिडणार आहेत. आता पहिल्या सामन्यात कोण बाजी मारणार? याची उत्सुकता आहे. इशान किशन सनरायझर्स हैदाराबादची धुरा सोपवण्यात आली आहे. पॅट कमिन्स दुखापतग्रस्त असल्याने त्याच्याकडे नेतृत्व आहे. त्यात इशान किशन सध्या जबरदस्त फॉर्मात आहे. त्याची झलक टी20 वर्ल्डकप 2026 स्पर्धेत दिसली.
विराट कोहलीचा हैदराबादविरुद्ध रेकॉर्ड
सनरायझर्स हैदराबादविरुद्ध सर्वाधिक धावांचा विक्रम हा विराट कोहलीच्या नावावर आहे. त्याने 24 सामन्यात 805 धावा केल्या आहेत. तर या दोन्ही संघांमध्ये सर्वात मोठी खेळी करण्याचा विक्रम जॉनी बेयरस्टोच्या नावावर आहे. त्याने सनरायझर्स हैदराबादसाठी खेळताना 56 चेंडूत 114 धावा केल्या आहे. तर सनरायझर्स हैदराबादकडून खेळताना डेविड वॉर्नरने सर्वाधिक 33 षटकार मारले आहे. इतकंच काय तर हैदराबादविरुद्ध आरसीबीने एकदा नांगी टाकली आहे. फक्त 68 धावांवर संपूर्ण संघ तंबूत गेला होता.
