0..2..4..6 आणि 91! कर्णधार इशान किशनचा झंझावात, राजस्थान रॉयल्सच्या गोलंदाजांना झोडलं

आयपीएल 2026 स्पर्धेच्या 21व्या सामन्यात राजस्थान रॉयल्स आणि सनरायझर्स हैदराबाद हे संघ आमनेसामने आले आहे. या सामन्यात नाणेफेकीचा कौल गमावल्याने सनरायझर्स हैदराबादच्या वाटेला प्रथम फलंदाजी आली. या सामन्याच्या पहिल्याच चेंडूवर हैदराबादला धक्का बसला. अभिषेक शर्मा खातं न खोलता तंबूत परतला. त्यामुळे संघ अडचणीत आला होता. पण कर्णधार इशान किशनने संघाला अडचणीतून बाहेर काढलं. इतकंच काय तर ट्रेव्हिस हेडची विकेट पडल्यानंतर त्याचा झंझावात काही थांबला नाही. त्याने आक्रमक बाणा कायम ठेवला. इशान किशनने 30 चेंडूत अर्धशतक पूर्ण केलं. त्यानंतर त्याने आपल्या भात्यातून चौकार आणि षटकारांचे बाण काढले. त्यामुळे राजस्थान रॉयल्सचे गोलंदाज पुरते हतबल दिसले. त्याने राजस्थान रॉयल्सच्या गोलंदाजांवर जोरदार प्रहार केला. त्याचं शतक अवघ्या 9 धावांनी हुकलं.

आयपीएल स्पर्धेत राजस्थान रॉयल्सविरुद्धच्या सामन्यात इशान किशनने 44 चेंडूत 8 चौकार आणि 6 षटकारांच्या मदतीने 91 धावांची खेळी केली. त्याने 206.82 च्या स्ट्राईक रेटने या धावा केल्या. संदीप शर्माच्या गोलंदाजीवर जोरदार फटका मारताना अंदाज चुकला. स्लो बॉलवर त्याच्या बॅटच्या कडेला बॉल लागला आणि वर चढला. संदीप शर्माने धावत जात स्वत: झेल पकडला. खरं तर विकेटकीपर जुरेल झेल पकडण्यासाठी सरसावला होता. त्यामुळे दोघांची टक्कर झाली, पण संदीपने झेल सोडला नाही. या स्पर्धेत त्याने चांगली कामगिरी केली पण ऑरेंज कॅपचा मान हुकला.

राजस्थान रॉयल्सविरुद्धचा सामना होण्यापूर्वी वैभव सूर्यवंशी 200 धावांसह ऑरेंज कॅपच्या शर्यतीत पुढे होता. पण इशान किशनने या सामन्यात 91 धावांची खेळी आणि 213 धावांसह त्याच्या पुढे निघून गेला. पण ऑरेंज कॅपच्या शर्यतीत हेनरिक क्लासेन पुढच्या काही धावा करत इशानला मागे टाकलं. इशान किशन बाद होताच काही धावा काढल्या आणि 213 धावांचा टप्पा ओलांडला. या सामन्यात वैभव सूर्यवंशी आणि यशस्वी जयस्वाल यांच्या कामगिरीकडे लक्ष असेल. या दोघांना पुन्हा एकदा टॉपला येण्याची संधी आहे.