आयपीएल स्पर्धेच्या इतिहासात अनिल कुंबळेच्या नावावर आश्चर्यकारक विक्रम, अंतिम फेरीत झालं असं की..
आयपीएल स्पर्धेच्या इतिहासात अनेक विक्रम रचले आणि मोडले गेले आहेत. काही विक्रम आश्चर्यकारकही आहेत. त्याची चर्चा आजही होत आहे. आयपीएल स्पर्धेत असाच एक विक्रम अनिल कुंबळेच्या नावावर आहे.
आयपीएल 2026 स्पर्धेला 28 मार्चपासून सुरूवात होणार आहे. या स्पर्धेतील पहिला सामना रॉयल चॅलेंजर्स बंगळुरू आणि सनरायझर्स हैदराबाद यांच्यात होणार आहे. असं असताना या स्पर्धेची रंगत वाढत जाणार यात काही शंका नाही. दुसरीकडे, या स्पर्धेतील काही आश्चर्यकारक विक्रमांची चर्चाही रंगली आहे. असाच एक विक्रम माजी क्रिकेटपटू अनिल कुंबळेच्या नावावर रचला गेला आहे. अनिल कुंबळे आयपीएल इतिहासातील एकमेव खेळाडू असा आहे की, अंतिम फेरीत गमावल्यानंतरही प्लेयर ऑफ द मॅचा मानकरी ठछरला आहे. अनिल कुंबळे 2009 मध्ये आरसीबीचा कर्णधार होता आणि डेक्कन चार्जर्स विरूद्ध अंतिम फेरीची लढत झाली होती. या सामन्यात आरसीबीचा फक्त 6 धावांनी पराभव झाला होता. पण असं असूनही अनिल कुंबळे प्लेयर ऑफ द मॅच ठरला होता. कारण की त्याने 4 षटकात 16 धावा देत 4 गडी बाद केले होते.
आयपीएल 2009 स्पर्धेच्या अंतिम सामन्यात प्रथम फलंदाजी करताना डेक्कन चार्जर्सने 20 षटकात 143 धावा केल्या होत्या. या सामन्यात हर्शल गिब्सने नाबाद 53 धावांची खेळी केली होती. तर सायमंड्सने 21 चेंडूत 33 धावा केल्या होत्या. पण अनिल कुंबळेने या सामन्यात जबरदस्त गोलंदाजी केली होती. आक्रमक फलंदाज एडम गिलख्रिस्टला शून्यावर बाद केलं होतं. तर सायमंड, रोहित शर्मा आणि वेणुगोपाळ राव यांची विकेट काढली होती. पण आरसीबीचा संघ 144 धावांचा पाठलाग करण्यात अपयशी ठरला. जॅक कॅलिस, राहुल द्रविड, रॉस टेलर, मार्क बाउचर, विराट कोहली असे फलंदाज असूनही पदरी निराशा पडली.
वनडे वर्ल्डकप स्पर्धेत कुंबळेच्या नावावर मोठा विक्रम
अनिल कुंबळे खेळाडू म्हणून आयपीएल किंवा वनडे वर्ल्डकप किताब जिंकण्यात अपयशी ठरला. पण आयपीएल आणि वनडे वर्ल्डकप स्पर्धेत त्याची कामगिरी जबरदस्त राहिली आहे. त्याने आयपीएल स्पर्धेत 45 विकेट काढल्या. त्याचा इकोनॉमी रेट हा फक्त 6.5 प्रति षटक होता. तर वनडे वर्ल्डकप स्पर्धेत त्याने 18 सामन्यात 31 विकेट काढल्या. त्याचा इकोनॉमी रेट हा 4 प्रति षटक आहे.
आयपीएल स्पर्धेच्या इतिहासात रॉयल चॅलेंजर्स बंगळुरु संघाने 2025 मध्ये पहिल्यांदा जेतेपद मिळवलं. यंदा जेतेपद राखण्याचं आव्हान आहे. यापूर्वी तीन वेळा अंतिम फेरी गाठली होती. पण तिन्ही वेळेस पदरी निराश पडली होती. 2009, 2011 आणि 2016 रोजी अंतिम फेरी गाठली होती. पण या तिन्ही वेळेस अयपश आलं होतं.
