IND vs ENG : कर्णधार शुबमन गिल आयसीसीच्या रडारवर, शतक ठोकलं पण एक चूक पडणार महागात

भारत इंग्लंड यांच्यात पहिला कसोटी सामना सुरु असून तिसरा दिवस निर्णायक ठरणार आहे. सामना कोणच्या पारड्यात झुकला हे दिवसाच्या शेवटी कळून येईल. दरम्यान, भारताकडून यशस्वी जयस्वाल, शुबमन गिल आणि ऋषभ पंतने शतकी खेळी केल्याने भारतीय संघ मजबूत स्थितीत आहे. कर्णधार शुबमन गिलच्या नेतृत्वात टीम इंडियाने चांगली सुरुवात केली. मात्र असं असताना शुबमन गिल आयसीसीच्या निशाण्यावर आला आहे. फलंदाजी करताना केलेली चूक त्याला महागात पडण्याची शक्यता आहे. सामनाधिकारी त्याच्यावर कारवाई करण्याची शक्यता आहे. शुबमन गिलने फलंदाजी करताना काळे मोजे घातले होते. आयसीसी ड्रेस कोड नियमाचं हे उल्लंघन होतं. कसोटी क्रिकेटमध्ये कोणताही फलंदाज काळे मोजे घालून फलंदाजी करू शकत नाही असा नियम आहे. नेमकं काय झालं ते समजून घेऊयात..

कसोटी क्रिकेटमध्ये आयसीसीने काही रंगांचे मोजे घालण्याची परवानगी दिली आहे. असं असताना शुबमन गिल मैदानात काळे मोजे घालून उतरला होता. आयसीसी नियम 19.45 नुसार, कसोटी सामन्यात फक्त पांढरे, क्रीम किंवा हलके तपकिरी रंगाचे मोजे घालण्याची परवानगी आहे. त्यामुळे शुबमन गिलवर कारवाई होऊ शकते. सामनाधिकारी रिची रिचर्डसन त्याच्या सामना फीच्या 10 ते 20 टक्के दंड आकारू शकतात. शुबमन गिलने चुकून किंवा त्याचे मोजे ओले असल्याने बदलले असतील कारवाई टाळली जाऊ शकते.

क्रिकेटमधील अशाच काही नियमांचा फटका यापूर्वी क्रिकेटपटूंना बसला आहे. 2016 मध्ये ख्रिस गेलने काळ्या रंगाची बॅट वापरली होती. तर 2018 मध्ये अफगाणिस्तानविरुद्धच्या सामन्यात केएल राहुलने चुकीचं हेल्मेट घातल्याने सामना फीच्या 10 टक्के दंड ठोठावण्यात आला आहे. 2019 च्या वनडे वर्ल्डकप स्पर्धेत इमाम उल हक बॅटवर चुकीचा लोगो घालून मैदानात उतरला होता. तेव्हा त्यालाही शिक्षा झाली होती. जो रुटने 2021 मध्ये भारताविरूद्धच्या सामन्यात इंद्रधनुष्य असलेलं चिन्ह लावलं होते. एलजीबीटीक्यू+ समर्थनार्थ होतं. तेव्हा त्याला 15 टक्के दंड भरावा लागला होता. आता शुबमन गिलवर कारवाई होते याकडे लक्ष लागून आहे.