SRH च्या गोटात मोठी धुसफूस! अभिषेक शर्मा नाराज; टीम सोडणार असल्याची चर्चा, नेमकं कारण आलं समोर

इंडियन प्रीमियर लीग २०२७ च्या आधी सनरायझर्स हैदराबाद संघातून एक मोठी बातमी समोर आली आहे. स्फोटक सलामीवीर फलंदाज अभिषेक शर्मा संघ व्यवस्थापनावर नाराज असून त्याला संघ सोडायचा असल्याचे बोलले जात आहे. सनरायझर्स हैदराबाद संघ सोडल्यास त्याच्यासाठी मुंबई इंडियन्स, गुजरात टायटन्स आणि दिल्ली कॅपिटल्ससह अनेक संघांमध्ये स्पर्धा निर्माण होण्याची शक्यता आहे.

मिळालेल्या माहितीनुसार, व्यस्त आंतरराष्ट्रीय वेळापत्रकामुळे कर्णधार पॅट कमिन्स आगामी आयपीएल हंगामासाठी उपलब्ध राहणार नसल्याचा चर्चा होत आहे. अशातच इशान किशनकडे संघाची सूत्रे सोपवली जाऊ शकतात. तर अभिषेक शर्मा देखील कर्णधारपदासाठी दावा करत असल्याचे मानले जात आहे. यामुळे आता फ्रँचायझीमध्ये मतभेद निर्माण झाले आहेत.

अभिषेक शर्माने अनेक फ्रँचायझींसोबत चर्चा केली असल्याचे बोलले जात आहे. परंतु अद्याप काहीही ठोस निष्पन्न झालेले नाही. ईशान किशनने कर्णधारपद स्वीकारल्यापासून अभिषेक शर्मा सनरायझर्सवर नाराज आहे, हे आता गुपित राहिलेले नाही. तो बऱ्याच काळापासून या फ्रँचायझीसोबत आहे. कर्णधारपदासाठी त्याच्या स्पष्ट महत्त्वाकांक्षा होत्या. मात्र त्याला ही जबाबदारी न देता इशानकडे सोपवली आहे. यामुळे तो नाराज आहे.

तर दुसरीकडे मुंबई इंडियन्स, गुजरात टायटन्स आणि पंजाब किंग्स यांचा संभाव्य पर्याय म्हणून विचार केला जात होता. दिल्ली कॅपिटल्सलाही वगळता येणार नाही. कारण त्याचा मार्गदर्शक युवराज सिंग आता त्या संघाचा भाग आहे. गेल्या हंगामात फ्रँचायझीने किशनकडे कर्णधारपद सोपवण्याचा निर्णय घेतल्यापासून संघात परिस्थिती तणावपूर्ण आहे.

सध्या कर्णधारपदाच्या फारशा संधी उपलब्ध नाहीत. कोलकाता नाईट रायडर्स आणि लखनौ सुपर जायंट्स हे दोन पर्याय आहेत. पण इतर बहुतेक संघ स्थिर झालेले दिसतात. त्यामुळे सनरायझर्स आणि अभिषेक शर्मा वेगळे होण्यास सहमत झाले तरी, मोठा प्रश्न हाच राहतो की, तो कुठे जाईल? जरी ते वेगळे झाले, तरी सनरायझर्सची भूमिका काय असेल? रोख रकमेचा सौदा? की खेळाडूंची अदलाबदल? यात अनेक घटक गुंतलेले आहेत.