गोलंदाजाचा विचित्र विक्रम! एकाच सामन्यात तब्बल 22 नो-बॉलची हद्द; लाजिरवाण्या कामगिरीचा व्हिडिओ व्हायरल

इराणी कपच्या तिसऱ्या दिवशी जम्मू आणि काश्मीरचा वेगवान गोलंदाज उमर नझीर मीरच्या बेशिस्त गोलंदाजीमुळे त्याच्या संघाला मोठा फटका बसला. आपली लाईन आणि लेंथ चुकवत नझीरने एकाच डावात १५ नो-बॉल टाकले आहेत. या सामन्यात त्याने आतापर्यंत एकूण २२ नो-बॉल टाकले आहेत. या चुकीचा सर्वात मोठा फटका जम्मू आणि काश्मीरला बसला. कारण शतक झळकावून खेळत असलेल्या रविचंद्रन स्मृतीला बाद करण्याचा प्रयत्न करूनही नो-बॉलमुळे त्यांना विकेट मिळाली नाही.

जम्मू आणि काश्मीरचा वेगवान गोलंदाज उमर नझीर मीरने या सामन्याच्या दुसऱ्या डावात तीन बळी घेतले असले तरी त्याच्या वारंवार टाकलेल्या नो-बॉलने सर्वांनाच चकित केले आहे. सामन्यातील सर्वात मोठा टर्निंग पॉइंट ‘रेस्ट ऑफ इंडिया’च्या दुसऱ्या डावाच्या ९० व्या षटकात आला. उमर नझीरने एका अचूक चेंडूवर शतकवीर रविचंद्रन स्मृतीला यष्टीसमोर पायचीत केले. पंचांनीही बोट वर करून त्याला बाद घोषित केले, पण त्याच क्षणी नाझीरचा पाय क्रीझच्या खूप बाहेर गेल्यामुळे सायरन वाजला.

The joy of a wicket, cut short by the crease 🚫

A fraction of an inch denies Umar Nazir a crucial breakthrough 🙅‍♂️

Updates ▶️ https://t.co/imfbVIsPep #IraniCup | @mflone_ pic.twitter.com/lPVMWOeqfW

— BCCI Domestic (@BCCIdomestic) October 3, 2026

पंचांनी तात्काळ तो नो-बॉल घोषित केला, ज्यामुळे स्मरणला मोठा दिलासा मिळाला. मिळालेल्या या दिलाशाचा पुरेपूर फायदा घेत स्मरणने १५ चौकार आणि ५ षटकारांसह १३१ चेंडूंमध्ये १२६ धावांची धडाकेबाज नाबाद खेळी केली. या शतकामुळे ‘रेस्ट ऑफ इंडिया’ संघ तिसऱ्या दिवशी ८ गडी गमावून ३०६ धावांपर्यंत पोहोचला. त्यांची एकूण आघाडी २६५ धावांपर्यंत वाढली. या डावात नाझीरने २२ षटकांत ८३ धावा देऊन ३ बळी घेतले, पण त्याच्या १५ नो-बॉलमुळे प्रतिस्पर्धी संघाला सतत धावा करता आल्या. पहिल्या डावात त्याने ७ नो-बॉल टाकले होते.

भारताच्या उर्वरित स्टार फलंदाजांनी पुन्हा एकदा निराशा केली. पाचव्या क्रमांकावर फलंदाजीला आलेल्या सरफराज खानला खराब फूटवर्कमुळे आपले खाते उघडता आले नाही आणि तो शून्यावर नझीरच्या हाती झेलबाद झाला. दरम्यान, कर्णधार ऋषभ पंत आठव्या क्रमांकावर फलंदाजीला आला, पण सलग दुसऱ्या डावात त्याची बॅट शांत राहिली. तो केवळ ८ धावांवर साहिल लोत्राच्या गोलंदाजीवर पायचीत झाला.