Shreyas iyer: कोहली, सूर्यकुमार परतल्यानंतर श्रेयसने कुठल्या पोझिशनवर बॅटिंगला यावं? गावस्करांनी दिलं उत्तर

मुंबई: श्रेयस अय्यर (Shreyas iyer) सध्या जबरदस्त फॉर्ममध्ये आहे. श्रीलंकेविरुद्धच्या तीन टी-20 सामन्यांच्या मालिकेत श्रेयसने प्रतिस्पर्धी संघाला आपल्या बॅटचा तडाखा दाखवला. त्याने सलग तीन अर्धशतक झळकवली. श्रेयसच्या या कामगिरीमुळे टीम मॅनेजमेंटसमोर संघ निवडीचा पेच वाढणार आहे. खरंतर रोहित शर्मा, (Rohit sharma) संघ व्यवस्थापनही T 20 वर्ल्डकपसाठी संघ निवड करताना अशा प्रकारच्या डोकेदुखीमुळे आनंदी असेलं. श्रेयसने श्रीलंकेविरुद्धच्या (India vs Srilanka) पहिल्या टी 20 मध्ये 57, दुसऱ्या सामन्यात 74 आणि तिसऱ्या सामन्यात 73 धावांची खेळी केली. आक्रमकतेबरोबरच परिस्थितीत ओळखून खेळण्याचं भानही श्रेयसच्या फलंदाजीत दिसून आलं. विराटच्या अनुपस्थितीत तिसऱ्या क्रमांकावर फलंदाजीची संधी मिळाली, त्याचा श्रेयसने पुरेपूर फायदा उचलला. विराट कोहली आणि सूर्यकुमार यादव संघात परतल्यानंतर श्रेयसने कुठल्या क्रमांकावर फलंदाजी करावी, या बद्दल भारताचे माजी कर्णधार सुनील गावस्कर यांनी आपलं मत मांडलं आहे.

वेस्ट इंडिज विरुद्धच्या तिसऱ्या टी-20 सामन्याआधी संघ व्यवस्थापनाने विराट कोहलीला विश्रांती दिली. त्यावेळी श्रेयस अय्यरला संघात स्थान मिळालं. वेस्ट इंडिज विरुद्ध त्याने 16 चेंडूत 25 धावांची खेळी केली. त्यानतंर श्रीलंकेविरुद्ध तीन टी-20 सामन्यात त्याने 204 धावा केल्या. यात तीन नाबाद अर्धशतक आहेत.

विराट आला मग श्रेयस कुठे?

विराट कोहली संघात परतल्यानंतर श्रेयस अय्यरला पुन्हा खालच्या क्रमांकावर फलंदाजीसाठी पाठवण्यात येईल. सूर्यकुमार यादवही प्रबळ दावेदार आहे. सूर्यकुमारने वेस्ट इंडिज विरुद्ध संपलेल्या टी 20 मालिकेत जबरदस्त प्रदर्शन केलं. त्यानंतर ऋषभ पंतही आहे. मग यामध्ये श्रेयस अय्यर कुठे फिट बसतो?

गावस्कर म्हणतात…

स्टार स्पोटर्सवर बोलताना सुनील गावस्करांनी ही एक समस्या असल्याचं मान्य केलं. “विराट कोहलीची जागा हलवता येणार नाही, असं गावस्करांना वाटतं. सूर्यकुमारसोबत चौथ्या किंवा पाचव्या क्रमांकावर श्रेयस अय्यर फिट बसू शकतो” असं गावस्करांच मत आहे.

“विराट कोहलीची फलंदाजीची जागा तुम्ही बदलू शकत नाही. तो तिसऱ्या क्रमांकावरच फलंदाजीसाठी येईल. याबद्दक कुठलीही शंका नाही. पण त्यावेळी तुम्ही श्रेयस अय्यर सारख्या फलंदाजाला चौथ्या किंवा पाचव्या क्रमांकावर पाठवू शकता” असं गावस्कर म्हणाले.

When virat surya kumar returns on which number Shreyas iyer should batted sunil gavaskar answers