IND vs SL: गॉल कसोटीत मोहम्मद सिराजसोबत दुसरा वेगवान गोलंदाज कोण? या दोन गोलंदाजांमध्ये सामना

भारत आणि श्रीलंका यांच्यात 15 ऑगस्टला पहिला कसोटी सामना सुरू होणार आहे. हा कसोटी सामना दोन्ही संघांसाठी महत्त्वाचा आहे. मालिकेतील आघाडी आणि वर्ल्ड टेस्ट चॅम्पियनशिप अंतिम फेरीच्या आशा जिवंत ठेवण्यासाठी विजय महत्त्वाचा आहे. असं असताना या सामन्यातील प्लेइंग 11 बाबत प्रचंड उत्सुकता आहे. श्रीलंकेतील खेळपट्ट्या या फिरकीला मदत करणाऱ्या आहेत. त्यामुळे प्लेइंग 11 कशी असेल याबाबत क्रीडाप्रेमींमध्ये चर्चा रंगली आहे. टीम इंडियात वेगवान गोलंदाजांना फार काही वाव नाही. त्यामुळे दोनच वेगवान गोलंदाज घेऊन टीम इंडिया उतरेल असं बोललं जात आहे. यात मोहम्मद सिराज याचं नाव निश्चित मानलं जात आहे. तर दुसरा वेगवान गोलंदाज कोण असेल? याची खलबतं सुरू आहेत. कसोटी क्रिकेटमध्ये गुरनूर ब्रारचं पदार्पण होऊ शकतं किंवा अनुभवी गोलंदाज प्रसिद्ध कृष्णाला संधी मिळू शकते.

निवड करणार तरी कशी?

जसप्रीत बुमराह या कसोटी मालिकेला मुकल्याने वेगवान गोलंदाजीवर निर्णय घेणं वाटतं तितकं सोपं नाही. बुमराह या मालिकेत असता तर त्याला मोहम्मद सिराजची साथ लाभली असती. पण आता बुमराह नसल्याने सिराजला एका गोलंदाजाची साथ गरजेची आहे. त्यामुळे टीम इंडियात तीन दावेदार आहे. यापैकी आकिब नबीचा विचार केला जाणार नाही. त्यामुळे गुरनूर ब्रार आणि प्रसिद्ध कृष्णा यांच्यात लढत आहे. त्यामुळे या दोघांपैकी एकाची निवड करणं खूपच डोकेदुखीचं काम असणार आहे. कारण सराव सामन्यात दोघांच्या आकडेवारीत फारसा फरक नाही. पहिल्या डावात प्रसिद्ध कृष्णाने 8 षटकात 32 दावा दिल्या होत्या, पण विकेट मिळाली नाही. पण दुसऱ्या डावात 8 षटकात 35 धावा देत 1 विकेट काढली. गुरनूरने पहिल्या डावात 12 षटकात 49 धावा देत 1 विकेट आणि दुसऱ्या डावात 8 षटकात 37 धावा देत 2 विके काढल्या होत्या.

गुरनूर ब्रारचं पारडं जड

दोघांच्या गोलंदाजीच्या आकडेवारीत फारसा फरक नसला तरी गुरनूर ब्रार उजवा आहे. त्याच्या गोलंदाजीला प्रसिद्धच्या तुलनेत अधिक धार आहे. त्याने श्रीलंकन फलंदाजांना अडचणीत आणलं होतं. इतकंच काय तर तीन विकेट काढल्या. त्या तुलनेत प्रसिद्ध कृष्णा टीम इंडियात बऱ्याच संधी मिळाल्या पण त्या संधीचं सोनं करता आलं नाही. त्याचा मागचा रेकॉर्ड फार प्रभाव टाकणारा नाही. त्यामुळे मोहम्मद सिराजसोबत गुरनूर ब्रार हा जोडीदार असू शकतो. त्याला कसोटी क्रिकेटमध्ये पदार्पणाची संधी मिळू शकते. कारण गुरनूर फक्त गोलंदाजीत नाही तर फलंदाजीतही योगदान देऊ शकतो. त्याने सराव सामन्यात त्याची झलक दाखवली आहे. एकाच षटकात 4 षटकार मारले होते.