WPL 2024, MI vs UPW : युपी वॉरियर्सने नाणेफेकीचा कौल जिंकत निवडली गोलंदाजी, अशी असेल प्लेइंग इलेव्हन
वुमन्स प्रीमियर लीग स्पर्धेतील सहावा सामना मुंबई इंडियन्स आणि युपी वॉरियर्स यांच्यात होत आहे. मुंबईने आतापर्यंत लीगमध्ये खेळलेले दोन सामने जिंकले आहेत. तर युपी वॉरियर्स आपल्या विजयाची आतुरतेने वाट पाहात आहे. त्यामुळे कोण बाजी मारतं? याकडे लक्ष लागून आहे. मुंबईची कर्णधार हरमनप्रीत कौर हीला आराम देण्यात आला आहे.
मुंबई : वुमन्स प्रीमियर लीग स्पर्धेत मुंबई इंडियन्स आणि युपी वॉरियर्स आमनेसामने आहेत. वुमन्स प्रीमियर लीगच्या मागच्या पर्वात हे दोन संघ तीन वेळा आमनेसामने आले होते. यात दोन सामन्यात मुंबई इंडियन्सने, तर एका सामन्यात युपी वॉरियर्सने बाजी मारली आहे. यंदाच्या स्पर्धेतील सुरुवातीचे सामने पाहता मुंबई इंडियन्सचं पारडं जड दिसत आहे. त्यामुळे यंदाच्या पर्वात कोण बाजी मारतं याची उत्सुकता ताणली गेली आहे. हरमनप्रीत कौरच्या नेतृत्वात मुंबई इंडियन्सने पहिल्या पर्वात बाजी मारली होती. आता या वर्षीही प्रबळ दावेदार असल्याचं पहिल्या दोन सामन्यातून दाखवून दिलं आहे. युपी वॉरियर्सला पराभूत करत गुणतालिकेत अव्वल स्थान गाठण्याचा मानस असणार आहे. दरम्यान युपी वॉरियर्सने नाणेफेकीचा कौल जिंकत प्रथम गोलंदाजी स्वीकारली आहे. त्यामुळे मुंबई इंडियन्सला मोठी धावसंख्या उभारण्याचं आव्हान असणार आहे. दव फॅक्टर पाहता मुंबई इंडियन्सला विजयासाठी धडपड करावी लागेल हे मात्र निश्चित आहे.
युपी वॉरियर्सची कर्णधार एलिसा हिली म्हणाली की, ‘आम्ही प्रथम गोलंदाजी करू. पहिल्या गेममध्ये आम्ही खूप जवळ आलो होतो. पण दुसऱ्या गेममध्ये हवी तशी कामगिरी झाली नाही. आमच्या संघात एक बदल आहे.” दुसरीकडे नॅट सायव्हर ब्रंट आणि एलिसा हिली यांच्यातील स्पर्धेबाबतही प्रश्न विचारला गेला. तेव्हा तिने सांगितलं की, “हे वुमन्स प्रीमियर लीग आहे. भारत आहे.”
दुसरीकडे, हरमनप्रीत दुखापतीमुळे या सामन्यात खेळणार नसल्याने नॅट सायव्हर ब्रंटकडे कर्णधारपद सोपवलं आहे. नॅट सायव्हर ब्रंट म्हणाली की, “हरमनला दुखापत असल्याने तिला विश्रांती द्यायची होती. शबमीन इस्माईलला दुखापतग्रस्त आहे. हरमनने आमचे चांगले नेतृत्व केले आहे, मी तिच्याकडून थोडेसे शिकले आहे.”
दोन्ही संघांची प्लेइंग इलेव्हन
मुंबई इंडियन्स महिला (प्लेइंग इलेव्हन): यास्तिका भाटिया (विकेटकीपर), हेली मॅथ्यूज, नॅट सायव्हर-ब्रंट (कर्णधार), अमेलिया केर, पूजा वस्त्राकर, अमनजोत कौर, इस्सी वाँग, एस सजना, हुमैरा काझी, कीर्थना बालकृष्णन, सायका इशाक
यूपी वॉरियर्स (प्लेइंग इलेव्हन): एलिसा हिली (विकेटकीपर/कर्णधार), वृंदा दिनेश, ताहलिया मॅकग्रा, ग्रेस हॅरिस, श्वेता सेहरावत, किरण नवगिरे, पूनम खेमनार, दीप्ती शर्मा, सोफी एक्लेस्टोन, अंजली सरवाणी, राजेश्वरी गायकवाड
