US Open 2021 च्या महिला गटात एमा राडुकानू विजयी, स्पर्धा जिंकत नवा विक्रमही केला नावे

अमेरिकन खुल्या टेनिस स्पर्धेमध्ये पुरुषांच्या फेरीत डेनिल मेदवेदेवने नोव्हाक जोकोव्हिचला नमवत विजय मिळवला आहे. तर महिला गटात एमा राडुकानूने लेयलाह फर्नांडेजला मात देत विजय आपल्या नावे केला आहे.

एमा राडुकानू

TV9 मराठी डिजीटल टीम | Edited By: shashank patil | Updated on: Sep 13, 2021 | 4:33 PM

US open 2021: टेनिस जगतातील मानाची स्पर्धा असणाऱ्या अमेरिकन ओपन टेनिस स्पर्धेत (US Open Tennis Tournament) पुरुष गटात लागलेल्या धक्कादायक निर्णयानंतर महिला गटातही नवी चॅम्पियन जगाला मिळाली आहे. पुरुषांमध्ये जगातील अव्वल क्रमांकाचा आणि सर्बियाचा स्टार टेनिसपटू नोव्हाक जोकोव्हिचला (Novak Djokovic) रशियाच्या डॅनिल मेदवेदेवने (daniil medvedev) नमवत पहिलं ग्रँडस्लॅम मिळवलं. तर महिलांमध्ये ब्रिटनच्या एमा राडुकानूने (emma raducanu) कॅनडाच्या लेयलाह फर्नांडेजला (Leylah Annie Fernandez) मात देत पहिलंच ग्रँडस्लॅम पटकावलं. त्यामुळे यंदा अमेरिकन ओपनमध्ये विजयी होणाऱ्या दोन्ही खेळाडूंच पहिलंच ग्रँड स्लॅम आहे.

पण एमासाठी हे ग्रँडस्लॅम असून खास आहे. कारण तिने या विजयासह एक नवा विक्रमही नावे केला आहे. राडुकानूने या जेतेपदासह ग्रँडस्लॅम जिंकणारी दुसरी युवा खेळाडू ठरली आहे. तिच्या आधी मारीया शारापोव्हाने वयाच्या 17व्या वर्षी विम्बल्डन स्पर्धा जिंकली होती. त्यानंतर आता एमाने 18 व्या वर्षी ही स्पर्धा जिंकली आहे.

असा झाला सामना

जवळपास दोन तास चाललेल्या या सामन्यात राडुकानूने फर्नांडेजला 6-4 6-3 च्या सरळ सेट्समध्ये मात दिली. तिने केलेल्या या अप्रतिम कामगिरीमुळे जगभरात तिचं कौतुक होत आहे. विजयापूर्वी एमा ही रँकिंगमध्ये 150 व्या स्थानावर होती. इतक्या खालच्या स्थानावर असतानाही तिने ही कामगिरी करुन दाखवली आहे. या विजयामुळे एमाच्या रँकिंगमध्ये बराच फरक पडणार आहे हे नक्की!

‘महिला टेनिसचं भविष्य उज्वल’

विजयानंतर एमाने बोलताना म्हणाली, ”मला वाटतं सध्याची महिला टेनिसची परिस्थिती आणि भविष्य फार सुंदर आहे. प्रत्येक महिला खेळाडू जी अशा मोठ्या स्पर्धेत ड्रॉ फेरीपर्यंत पोहचते. ती कोणतीही स्पर्धा जिंकू शकते. मला आशा आहे की भविष्यात अनेक महान महिला खेळाडू जगासमोर येणार आहेत.”