FIFA World Cup 2026: इंग्लंड संघ थांबणार त्या बेसजवळ फायरिंग, अंदाधुंद गोळीबारात 9 जण जखमी
फिफा वर्ल्डकप स्पर्धेसाठी 48 संघाची तयारी अंतिम टप्प्यात आली आहे. सर्व संघ अमेरिकेत दाखल असून सराव शिबिरात अंतिम धडे गिरवत आहे. असं असताना इंग्लंडच्या बेसजवळ गोळीबार झाल्याने खळबळ उडाली आहे. यात 9 जण जखमी झाले आहेत.
फिफा वर्ल्डकप 2026 स्पर्धेसाठी आता काही दिवस उरले असताना एक धक्कादायक घटना घडली आहे. स्पर्धेचं आयोजन अमेरिका, मेक्सिको आणि कॅनडामध्ये होत आहेत. असं अमेरिकेत या स्पर्धेपूर्वी बेछूट गोळीबार झाल्याची घटना समोर आली आहे. त्यामुळे क्रीडाप्रेमी आणि फुटबॉलपटूंमध्ये भीतीचं वातावरण आहे. कारण हा गोळीबार इंग्लंड संघाच्या बेसजवळ झाल्याने चर्चा रंगली आहे. फुटबॉल वर्ल्डकप स्पर्धेसाठी इंग्लंडचा सराव शिबीर मिसौरीच्या कनसास सिटीजवळ आहे. या सराव शिबिराजवळ गोळ्यांचा धडाधड आवाज आला. या अंदाधुंद गोळीबारात 9 जण जखमी झाल्याची माहिती समोर आली आहे. पोलिसांनी दिलेल्या माहितीनुसार, गोळीबार इंग्लंड संघाच्या सराव शिबिरापासून 10 मिनिटं लांब असलेल्या ठिकाणी शनिवारी हे प्रकरण घडलं. हा प्रकार सकाळी 4 वाजता घडला.
पोलिसांनी सांगितलं की, इंग्लंड संघाचं हॉटेल तिथपासून अगदी जवळ आहे. पण इंग्लंडचा संघ अजून फिफा वर्ल्डकप स्पर्धेसाठी कनसास सिटीत पोहोचलेला नाही. कनसास सिटीत जेव्हा सदर घटना घडली तेव्हा इंग्लंडचा संघ फ्लोरिडाच्या पाल्म बीचजवळ वर्ल्डकप स्पर्धेचा सराव करत होता. इंग्लंड संघ 13 जूनला कनसास सिटीत दाखल होणार आहे. कॅनसास सिटी पोलिसांच्या म्हणण्यांनुसार, गोळीबार घडल्याची घटना घडताच पोलीस घटनास्थळी दाखल झाले. तिथे गोंधळ उडाला होता आणि जखमी झालेल्या महिलांना तात्काळ जवळच्या रुग्णालयात दाखल करण्यात आलं.
पोलिसांनी दिलेल्या माहितीनुसार, नऊ जण या गोळीबारात जखमी झाले आहेत. पण यात कोणीही गंभीर जखमी नाही. या प्रकरणाचा पोलीस तपास करत आहेत. तसेच आरोपीच्या मुसक्या आवळण्यासाठी जोरदार प्रयत्न सुरू आहेत.
फिफा वर्ल्डकप स्पर्धेत सहभागी होण्यापूर्वी इंग्लंडने न्यूझीलंडविरुद्ध एक सराव सामना खेळला. यात 1-0 ने न्यूझीलंडला पराभवाची धूळ चारली. आता दुसरा सराव सामना बुधवारी कोस्टा रिकाविरुद्ध होणार आहे. फिफा विश्वचषक 2026 दरम्यान कानसास सिटी हे इंग्लंडचे मुख्य तळ असेल.
इंग्लंडच संघ एल गटात असून क्रोशिया, घाना आणि पनामा हे देश आहेत. इंग्लंडचा पहिला सामना क्रोशियविरुद्ध 18 जूनला, त्यानंतर 24 जुनला घाना आणि 28 जूनला पनामाशी सामना होईल.
