अमॅच्युअर कबड्डी फाऊंडेशन ऑफ महाराष्ट्रच्या कार्याध्यक्षपदी पुनीत बालन यांची निवड

अमॅच्युअर कबड्डी फाऊंडेशन ऑफ महाराष्ट्रच्या कार्याध्यक्षपदी युवा उद्योजक पुनीत बालन यांची निवड करण्यात आली आहे. फाऊंडेशनच्या विशेष कार्यकारी सभेत या निवडीचा ठराव सर्वानुमते मंजूर करण्यात आला. अमॅच्युअर कबड्डी फाऊंडेशन ऑफ महाराष्ट्रची वार्षिक सभा पुणे जिल्ह्यातील आळंदी येथे पार पडली. सपना वाघमोडे यांच्या अध्यक्षतेखाली आणि भारती जगताप यांच्या प्रमुख उपस्थितीत झालेल्या या सभेला संस्थेचे पदाधिकारी तसेच विविध क्रीडा क्षेत्रातील मान्यवर उपस्थित होते.

सभेत संस्थेच्या भविष्यातील वाटचालीबाबत सखोल चर्चा करण्यात आली. संघटनेला अधिक सक्षम, गतिमान आणि पारदर्शक बनविण्यासाठी विविध उपाययोजनांवर विचारमंथन झाले. याच पार्श्वभूमीवर अनुभवी आणि कार्यक्षम नेतृत्व म्हणून पुण्यातील युवा उद्योजक तसेच पुनीत बालन ग्रुपचे अध्यक्ष पुनीत बालन यांच्यावर कार्याध्यक्षपदाची जबाबदारी सोपविण्यात आली.

पुनीत बालन हे महाराष्ट्रातील क्रीडा विकासासाठी सातत्याने कार्यरत असलेले व्यक्तिमत्त्व असून विविध क्रीडा स्पर्धा, लीग आणि युवक उपक्रमांमध्ये त्यांनी महत्त्वपूर्ण योगदान दिले आहे. त्यांच्या अनुभवामुळे क्रीडा व्यवस्थापनातील त्यांची समज अधिक भक्कम मानली जाते. त्यांच्या नेतृत्वाखाली राज्यातील कबड्डी खेळाला अधिक संघटित, पारदर्शक आणि व्यावसायिक दिशा मिळेल, असा विश्वास सभेत व्यक्त करण्यात आला.

नियुक्तीनंतर प्रतिक्रिया देताना पुनीत बालन म्हणाले, “अमॅच्युअर कबड्डी फाऊंडेशन ऑफ महाराष्ट्रने कार्याध्यक्ष पदाच्या माध्यमातून माझ्यावर विश्वास दाखवल्याबद्दल सर्व पदाधिकारी आणि सदस्यांचे मनःपूर्वक आभार. कबड्डी हा आपल्या मातीतला खेळ असून त्याला राज्य आणि राष्ट्रीय पातळीवर अधिक बळकटी देणे ही आपली सामूहिक जबाबदारी आहे. आगामी काळात पारदर्शकता, व्यावसायिक नियोजन आणि नव्या संधींच्या माध्यमातून खेळाडूंना प्रोत्साहन देण्यासाठी मी कटिबद्ध आहे. तळागाळातील प्रतिभेला योग्य व्यासपीठ मिळण्यासाठी निश्चित प्रयत्न केले जातील.”

या निवडीमुळे नव्या तंत्रज्ञानाचा वापर, खेळाडूंना अधिक संधी उपलब्ध करून देणे, स्पर्धांचे प्रभावी आयोजन आणि संघटनेची विश्वासार्हता वाढविणे या बाबींवर विशेष भर दिला जाईल, अशी अपेक्षा व्यक्त करण्यात आली. उपस्थित मान्यवरांनीही बालन यांच्या निवडीचे स्वागत करत त्यांच्या नेतृत्वामुळे संघटनेला नवी ऊर्जा मिळेल, असा विश्वास व्यक्त केला.

या निवडीसंदर्भातील ठराव सातारा येथील ज्ञानेश काळे यांनी मांडला, तर छत्रपती संभाजीनगर येथील गोकुळ तांदळे यांनी त्यास अनुमोदन दिले. त्यानंतर सर्वानुमते ठराव मंजूर करण्यात आला. आगामी काळात राज्य व राष्ट्रीय स्तरावरील कबड्डी स्पर्धांच्या आयोजनात संघटनेच्या माध्यमातून अधिक सक्रिय भूमिका बजावण्याचा निर्णयही या बैठकीत घेण्यात आला.