U19 Asia Cup 2026 IND vs PAK Final : समोर पाकिस्तानची टीम, लास्ट बॉलवर विजयासाठी 3 धावांची गरज, थेट बाऊंड्री मारुन भारताने जिंकला आशिया कप
U19 Asia Cup 2026 IND vs PAK Final : भारताने अंडर 19 आशिया कप जिंकला. शेवटच्या चेंडूपर्यंत श्वास रोखून धरायला लावणाऱ्या सामन्यात भारताने पाकिस्तानवर मात केली.
चित्तथरारक, रोमहर्षक, रोमांचक हे शब्दही भारत-पाकिस्तान अंडर 19 फायनलचं वर्णन करायला कमी पडतील. ओमान मध्ये आज भारत-पाकिस्तान संघात अंडर 19 आशिया कप टुर्नामेंटची फायनल झाली. अखेरच्या चेंडूपर्यंत श्वास रोखून धरायला लावणाऱ्या या सामन्यात भारताच्या मुलांनी अक्षरश: शेवटच्या चेंडूवर विजय खेचून आणला. शेवटच्या षटकात भारतासमोर विजयासाठी 8 धावांची गरज होती. शेवटी सामना 1 चेंडू 3 धावा असा झाला. स्ट्राइकवर मोहित उलवा आणि चिगुरपती वेंकटा ही जोडी होती. अहमद हुसैन या पाकिस्तानी स्पिनरच्या हाती चेंडू होता. स्ट्राइकवर मोहित उलवा होता. त्याने हुसैनच्या शेवटच्या चेंडूवर चौकार मारुन अशक्यप्राय वाटणारा विजय शक्य करुन दिला. पाकिस्तानने भारतासमोर 338 धावांचं अवघड लक्ष्य ठेवलं होतं. भारताच्या मुलांनी हे टार्गेट पार करुन आशिया कप जिंकण्याचं पाकिस्तानचं स्वप्न धुळीस मिळवलं. या विजयासह साखळी गटातील पहिल्या पराभवाचा बदला सुद्धा पूर्ण केला.
19 वर्षांखालील आशिया कप 2026 चा अंतिम सामना भारत आणि पाकिस्तान यांच्यात खेळला गेला. भारताला नवव्यांदा आशिया कप ट्रॉफी जिंकण्यासाठी 338 धावांचे लक्ष्य देण्यात आले होते. ओमानमधील अल अमिरात येथील मिनिस्ट्री टर्फ-2 मैदानावर प्रथम फलंदाजी करताना पाकिस्तानने 9 गडी गमावून 337 धावा केल्या होत्या. नाणेफेक जिंकून प्रथम फलंदाजी करण्याचा निर्णय घेतलेल्या पाकिस्तानकडून सलामीवीर उस्मान खानने 107 धावांचे शतक झळकावले. त्याने आपल्या 11 चेंडूंच्या खेळीत 11 चौकार आणि तीन षटकार मारले.
अब्दुल कादिरची जबरदस्त बॅटिंग
अब्दुल कादिर आणि कर्णधार फरहान युसूफ यांनीही अर्धशतके झळकावली. कादिरने 54 चेंडूंमध्ये तीन चौकार आणि आठ षटकारांसह 80 धावांची स्फोटक खेळी केली. फरहानने 60 चेंडूंमध्ये 63 धावा केल्या. फरहानने चार चौकार आणि तीन षटकार मारले.
(बातमी अपडेट होत आहे)
