डिटॅचेबल कीबोर्ड आणि स्नॅपड्रॅगन प्रोसेसर असलेला एचपीच्या 2 इन 1 टॅबवर 5 हजार रुपयांची सूट
एचपी ओम्निपॅड 12 भारतात विक्रीसाठी उपलब्ध झाला असून, 12-इंचाचा 2K डिस्प्ले आणि स्नॅपड्रॅगन प्रोसेसर असलेला हा कंपनीचा पहिला टॅब्लेट ठरला आहे. चला तर मग या टॅबची किंमत आणि उपलब्धता याबद्दल जाणून घेऊयात.
भारतात एचपी ओम्निपॅड 12 ची विक्री सुरू झाली आहे. हा कंपनीचा भारतात लाँच झालेला पहिला टॅब्लेट आहे. यात 90Hz रिफ्रेश रेट असलेला 12-इंचाचा 2K डिस्प्ले आहे. हा एचपी टॅब्लेट क्वालकॉम स्नॅपड्रॅगन प्रोसेसर आणि 8GB रॅमसह लाँच करण्यात आला आहे. या एचपी टॅब्लेटचे स्टोरेज मायक्रोएसडी कार्डच्या मदतीने 1TB पर्यंत वाढवता येते. हा डिटेचेबल कीबोर्डसह येतो आणि अँड्रॉइड 16 वर चालतो.
एचपी ओम्निपॅड 12 ची किंमत आणि उपलब्धता
एचपी ओम्निपॅड 12 भारतात 48 हजार 999 रूपयांच्या सुरुवातीच्या किंमतीसह लाँच करण्यात आला आहे. 256GB स्टोरेज व्हेरिएंटची किंमत 54 हजार 999 रूपये आहे. हा टॅब्लेट डेनिम ब्लू आणि मेटिअर सिल्व्हर या दोन रंगांच्या पर्यायांमध्ये उपलब्ध आहे. ओम्निपॅड 12 टॅब्लेट तुम्ही एचपी ऑनलाइन स्टोअर, ॲमेझॉन, फ्लिपकार्ट, रिलायन्स डिजिटल, क्रोमा, विजय सेल्स आणि एचपी वर्ल्ड स्टोअर्समधून खरेदी करू शकता.
तसेच या टॅबच्या खरेदीवेळेस लाँच ऑफरमध्ये 20 ऑगस्टपर्यंत एसबीआय (SBI) आणि एचडीएफसी (HDFC) बँकेच्या क्रेडिट कार्डवर 5 हजार रूपयांची त्वरित सूट समाविष्ट आहे. कंपनी जीपीटी-5 (GPT-5), क्लाउड 4 (Cloud 4), जेमिनी 2.5 (Gemini 2.5), पर्प्लेक्सिटी (Perplexity), ग्रोक 4 (Grok 4) आणि डीपसीक (DeepSeek) यांसारख्या अनेक एआय (AI) प्लॅटफॉर्मचे एक वर्षाचे मोफत सबस्क्रिप्शन देखील देत आहे, ज्याची एकूण किंमत अंदाजे 96 हजार रूपये आहे.
एचपी ओम्निपॅड 12 ची वैशिष्ट्ये
एचपी ओम्निपॅड 12 मध्ये 16:10 आस्पेक्ट रेशो, 400 निट्सपर्यंत ब्राइटनेस आणि 90Hz रिफ्रेश रेट असलेला 12-इंचाचा 2K मल्टी-टच डिस्प्ले आहे. यात हेक्सा-कोअर क्वालकॉम स्नॅपड्रॅगन SM6475Q प्रोसेसर आहे. तसेच या टॅबमध्ये 8GB LPDDR5 रॅम आणि 128GB किंवा 256GB UFS ऑनबोर्ड स्टोरेज आहे.
हा एचपी टॅब्लेट 2-इन-1 डिव्हाइस म्हणून डिझाइन केलेला आहे, ज्यामध्ये काढता येण्याजोगा कीबोर्ड आहे. वापरकर्ते याचा वापर टॅब्लेट आणि लॅपटॉप अशा दोन्ही प्रकारे करू शकतात. एचपी ओम्निपॅड 12 मध्ये 8-मेगापिक्सलचा फ्रंट कॅमेरा आणि 13-मेगापिक्सलचा रियर कॅमेरा आहे.
कनेक्टिव्हिटीसाठी, या एचपी टॅबलेटमध्ये वाय-फाय 6E, ब्लूटूथ 5.2 आणि एक यूएसबी टाइप-सी पोर्ट दिला आहे. यात ड्युअल-सेल 31 Wh लि-आयन पॉलिमर बॅटरी आहे. कंपनीचा दावा आहे की एकदा चार्ज केल्यावर याची बॅटरी सुमारे 18 तास चालते.
