मार्व्हलस डिझाईन, ४० वॅटचा धमाका अन्…; Gobolt चे मस्टँग सिरीज भारतात लाँच, किंमत तुमच्या बजेटमध्ये

गोबोल्टने भारतीय ऑडिओ मार्केटमध्ये आपले नवीन मस्टँग जीटी२० आणि मस्टँग जीटी४० ब्लूटूथ स्पीकर्स लॉन्च केले आहेत. हे स्पीकर्स दमदार आवाज आणि प्रीमियम ब्रँड्ससारखे दिसणारे स्टायलिश डिझाइन देतात. कंपनीने यामध्ये अनुक्रमे 20 वॅट आणि 40 वॅटचा साउंड आउटपुट दिला आहे. तसेच, यामध्ये RGB लायटिंग आणि लेदर फिनिश देण्यात आली आहे. चला तर मग या स्पीकरच्या किंमती आणि वैशिष्ट्यांबद्दल जाणून घेऊयात.

किंमत आणि उपलब्धता

GoBoult Mustang GT20 भारतात त्याच्या मूळ किंमत 3 हजार 999 रूपयांवरून कमी होऊन 2 हजार 999 रूपयांच्या किंमतीत लाँच करण्यात आला आहे. हा स्पीकर टर्बो आइस (Turbo Ice) आणि टर्बो ब्लॅक (Turbo Black) या रंगांच्या पर्यायांमध्ये उपलब्ध आहे. मस्टँग जीटी40 (Mustang GT40) 3 हजार 999 सुरुवातीच्या किंमतीत लाँच करण्यात आला असून, त्याची रिटेल किंमत 5 हजार 999 रूपये आहे. हे मॉडेल एपेक्स ब्लॅक (Apex Black) आणि ऑक्सफर्ड व्हाइट (Oxford White) या फिनिशमध्ये येते. दोन्ही स्पीकर्स कंपनीच्या अधिकृत वेबसाइटवरून तसेच ॲमेझॉन, फ्लिपकार्ट, मिंत्रा आणि इतर ई-कॉमर्स प्लॅटफॉर्मवरून खरेदी करता येतील.

मस्टँग स्टाईल आणि आरजीबी चार्म

या स्पीकर्सची रचना मस्टँग कारपासून प्रेरित आहे, ज्यामध्ये मेटॅलिक ग्रिल, लेदर टेक्सचर फिनिश आणि RGB लायटिंग आहे. मस्टँग GT20 मध्ये इग्निशन स्टाईल कंट्रोल, मस्टँगसारखा स्टार्टअप साउंड, फ्युएल गेजसारखा बॅटरी इंडिकेटर आणि जॉयस्टिक कंट्रोल आहे. तर GT40 मध्ये व्हॉल्यूम, बेस आणि ट्रेबलसाठी मेटॅलिक नॉब्स, सोबतच एक लेदर स्ट्रॅप आणि एक मजबूत बॉडी डिझाइन आहे. दोन्ही स्पीकर्समध्ये TWS सपोर्ट आहे, ज्यामुळे दोन स्पीकर्स एकत्र जोडून स्टिरिओ साउंड मिळवता येतो. IPX4 रेटिंगमुळे हे स्पीकर्स पाण्याच्या हलक्या शिडकाव्यापासून देखील संरक्षित आहेत.

‍आवाज, कनेक्टिव्हिटी आणि बॅटरीची कार्यक्षमता

गोबोल्ट मस्टँग GT20 मध्ये 20W साउंड आउटपुट आहे, तर GT40 मध्ये 40W आउटपुट आहे, ज्यामध्ये ड्युअल ड्रायव्हर्स आणि पॅसिव्ह बास रेडिएटरचा वापर केला आहे. दोन्ही स्पीकर्स ब्लूटूथ 6.0 सह येतात आणि अंदाजे 10 मीटरची वायरलेस रेंज देतात. USB आणि TF कार्ड सपोर्ट देखील दिला आहे, ज्यामुळे अनेक डिव्हाइसेसना जोडणे सोपे होते. GT20 ची बॅटरी लाईफ 7 तासांपर्यंत आणि GT40 ची 6 तासांपर्यंत आहे. दोन्हीमध्ये टाइप-सी चार्जिंगची सोय आहे.