तुमचा फोन हरवला? मग आता एकाच पोर्टलवरुन करा फोन आणि सिम ब्लॉक, स्टेप-बाय-स्टेप प्रोसेस कशी?

फोन चोरीला जाणे किंवा सिम कार्ड हरवणे ही केवळ एक साधी समस्या नसून यामुळे तुमचे मोठे आर्थिक नुकसान देखील होऊ शकते. आजच्या डिजीटल युगात तुमचे सिम कार्ड केवळ फोन कॉलसाठी मर्यादित राहिलेले नाही. ते तुमच्या बँक खात्याशी, आधार कार्डशी, UPI पेमेंट ॲप्स जसे की PhonePe, Google Pay आणि इतर महत्त्वाच्या सेवांशी जोडलेले असते. तसेच हल्ली बहुतांश ऑनलाईन ट्रान्झॅक्शनसाठी आवश्यक असणारा OTP याच नंबरवर येतो. त्यामुळे जर हे सिम कार्ड चुकीच्या हातात पडले, तर त्याचा गैरवापर करून आर्थिक फसवणूक होण्याची दाट शक्यता असते.

तुमच्याकडे Jio, Airtel, Vi (Vodafone Idea) किंवा BSNL यांपैकी कोणत्याही कंपनीचे सिम कार्ड असो, ते हरवल्यास त्वरित ब्लॉक करणे आणि नवीन सिम मिळवणे अत्यंत आवश्यक आहे. त्यासाठी काही सोप्या टीप्स वापरुन तुम्ही ते ब्लॉक करु शकता.

कस्टमर केअरला कॉल करून सिम ब्लॉक करा

सिम कार्ड हरवल्याचे समजताच दुसऱ्या कोणत्याही फोनवरून खालील कस्टमर केअर नंबरवर कॉल करा. प्रतिनिधीला तुमच्या सिम कार्डची मालकी पटवून देण्यासाठी काही वैयक्तिक माहिती (जसे की नाव, जन्मतारीख, पत्ता आणि शेवटचे रिचार्ज) द्यावी लागेल.

• Jio ग्राहक: 1800-889-9999 वर कॉल करा.
• Airtel ग्राहक: १२१ (Airtel नंबरवरून) किंवा 1800-103-4444 वर कॉल करा.
• Vi ग्राहक: १९९ (Vi नंबरवरून) किंवा 9820098200 वर कॉल करा.
• BSNL ग्राहक: १५०३ (1503) किंवा 1800-180-1503 वर कॉल करा.

कंपनीच्या अधिकृत वेबसाइट किंवा ॲपचा वापर करा

सर्वच प्रमुख टेलिकॉम कंपन्या त्यांच्या वेबसाइट आणि अधिकृत ॲप्सवर ‘लॉस्ट सिम’ (Lost SIM) किंवा सिम ब्लॉक करण्याची सुविधा देतात. यासाठी संबंधित कंपनीच्या (MyJio, Airtel Thanks, Vi App) अधिकृत ॲप किंवा वेबसाइटला भेट द्या. तिथे ‘Support’ किंवा ‘Help & Support’ सेक्शनमध्ये जाऊन ‘Block SIM’ किंवा ‘Lost SIM’ चा पर्याय निवडा. तुमचा हरवलेला नंबर टाकून पर्यायी नंबरवर येणाऱ्या OTP द्वारे किंवा पडताळणीच्या इतर पायऱ्या पूर्ण करून सिम निलंबित (Suspend) करा.

‘संचार साथी’ (Sanchar Saathi) पोर्टलचा वापर करा  

भारत सरकारच्या दूरसंचार विभागाने ‘Sanchar Saathi’ (sancharsaathi.gov.in) हे पोर्टल सुरू केले आहे. या पोर्टलवरील CEIR (Central Equipment Identity Register) या सेवेच्या मदतीने तुम्ही देशातील कोणत्याही कंपनीचे सिम कार्ड आणि चोरीला गेलेला फोन दोन्ही एकाच ठिकाणाहून ब्लॉक करू शकता. यामुळे तुमचा फोन संपूर्ण देशात कुठेही वापरता येणार नाही.

हरवलेले सिम कार्ड बदलून कसे मिळवायचे?

सिम कार्ड यशस्वीरित्या ब्लॉक केल्यानंतर, तुम्ही ते जवळच्या संबंधित टेलिकॉम ऑपरेटरच्या स्टोअरमध्ये (उदा. Jio Store, Airtel Store, Vi Store) जाऊन बदलून (Replace) घेऊ शकता. सिम बदलण्यासाठी तुमच्याकडे मूळ ओळखीचा वैध पुरावा (POI) असणे आवश्यक आहे. यासाठी आधार कार्ड हा सर्वोत्तम पर्याय आहे. तुमच्या नावावर सिम असेल, तर तुम्हाला स्वतः तिथे जावे लागेल. सिम बदलण्यासाठी कंपन्यांनुसार ₹२५ ते ₹५० पर्यंत नाममात्र शुल्क आकारले जाते. सिम बदलून घेताना तुमच्या त्या नंबरवर एक सक्रिय (Active) रिचार्ज प्लॅन असणे आवश्यक आहे.

ट्राय (TRAI) च्या सुरक्षा नियमांनुसार, नवीन सिम कार्ड सुरू झाल्यानंतर पहिल्या २४ या २४ तासांसाठी एसएमएस (SMS) सेवा पूर्णपणे बंद असते. म्हणजेच २४ तासांनंतरच तुम्हाला बँकेचे ओटीपी (OTP) किंवा सामान्य मेसेज येणे सुरू होईल. त्यामुळे जर तुमचा फोन किंवा सिम हरवल्यास अजिबात वेळ न घालवता वरील पद्धतींचा वापर करून आधी सिम सुरक्षित करा, जेणेकरून कोणत्याही संभाव्य सायबर गुन्ह्यापासून किंवा फसवणुकीपासून तुमचा बचाव होईल.