Investment Scheme : अवघ्या 150 रुपयांची बचत करेल मुलाला लखपती
Investment Scheme : या योजनेत तुम्हाला कमी गुंतवणूक करावी लागत असली तरी परतावा मात्र जोरदार मिळेल. ही योजना तुमच्यासाठी फायदेशीर आहे.
नवी दिल्ली : देशातील सर्वात मोठी सरकारी विमा कंपनी, भारतीय आयुर्विमा महामंडळ (LIC) प्रत्येक वयाच्या नागरिकांसाठी योजना चालविते. ही विमा कंपनी मुलांपासून ते वयोवृद्धापर्यंत खास आकर्षक योजना आणते. एलआयसीच्या काही योजना अत्यंत लोकप्रिय आहे. या योजनेत गुंतवणूकदारांना गुंतवणुकीवर जोरदार परतावा मिळतो. जर तुम्ही पण मुलांच्या भविष्यासाठी गुंतवणूक करु इच्छित असाल तर एलआयसीची जीवन तरुण योजना (LIC Jeevan Tarun Policy) गुंतवणुकीसाठी सर्वोत्तम आहे. या योजनेत मुलांच्या भविष्यासाठी आर्थिक तरतूद करता येते. त्यातून मुलांच्या शिक्षणासाठी वा इतर कामासाठी आर्थिक सोय होते.
एलआयसीची जीवन तरुण योजना नॉन लिंक्ड, वैयक्तिक, विमा योजना आहे. विमा कंपनी या योजनेत गुंतवणूक केल्यास सुरक्षा आणि बचत दोन्ही सुविधा देते. मुलांच्या भविष्यातील शिक्षणाचा खर्च आणि इतर आवश्यकतेनुसार गुंतवणूकदार या योजनेत गुंतवणूक करु शकतात.
मुलांच्या नावे ही योजना घेण्यासाठी मुलांचे वय कमीत कमी 90 दिवस आणि कमाल 12 वर्ष असणे आवश्यक आहे. यापेक्षा मोठ्या मुलांसाठी या योजनेत गुंतवणूक करता येत नाही. मुलगा अथवा मुलगी 25 वर्षांचा झाल्यानंतर या योजनेत पूर्ण फायदे मिळतात.
मुलाचे वय 20 वर्षे होईपर्यंत तुम्हाला हप्ता भरावा लागतो. कमीत कमी 75,000 रुपयांच्या सम अॅश्युर्डसाठी ही विमा योजना खरेदी करता येते. या योजनेत कमाल गुंतवणुकीसाठीची अट वा मर्यादा नाही. जर तुम्ही 12 वर्षाच्या मुलासाठी विमा योजना खरेदी करत असाल तर, किमान सम अॅश्युर्ड रक्कम पाच लाख रुपये असेल आणि कालावधी 13 वर्षांचा असेल.
दररोज 150 रुपयांची बचत तुमच्या मुलांच्या उज्ज्वल भविष्यासाठी उपयोगी पडेल. या योजनेत गुंतवणूक करणार असाल तर वार्षिक प्रीमियम 54,000 रुपये असेल. पुढील आठ वर्षात तुम्ही या योजनेत 4,32,000 रुपयांची गुंतवणूक कराल.
या योजनेतील गुंतवणुकीवर 2,47,000 रुपयांचा बोनस मिळेल. या योजनेवर तुम्हाला पाच लाखांचा सम अॅश्योर्ड मिळेल. तसेच 97,000 रुपयांचे लॉयल्टी बोनस मिळेल. 4,32,000 रुपयांच्या गुंतवणुकीवर तुम्हाला एकूण 8,44,500 रुपये मिळतील.
कोणतीही व्यक्ती वार्षिक, सहामाही, तिमाही अथवा मासिक आधारावर हप्त्याची रक्कम जमा करु शकते. एलआयसीने मुलांच्या भविष्याच्या दृष्टीने ही योजना तयार केली आहे. मुलांचे शिक्षण आणि इतर गरजा लक्षात घेऊन या योजनेत गुंतवणूक करणे फायदेशीर ठरेल.
आता विविध पेमेंट अॅप आणि गेटवेमुळे (LIC Premium Through UPI) काही मिनिटांतच पेमेंट होते. त्यासाठी एलआयसीच्या कार्यालयात जाऊन चकरा मारण्याची गरज नाही. आता ग्राहक खिशात रोख रक्कम ठेवण्याऐवजी पेटीएम, फोन पे, गुगल पे यांच्यामार्फत सहज प्रीमियम भरु शकतात.
