सिडकोच्या जानेवारी 2022 गृहनिर्माण योजनेच्या सोडतीचा प्रारंभ, सिडकोची घरे सर्वसामान्यांना परवडणारी, मंत्री एकनाथ शिंदे यांचे प्रतिपादन
सध्याच्या महागाई (Inflation)आणि मंदीच्या काळात सिडकोची परवडणाऱ्या दरातील घरे ही सर्वसामान्य नागरिकांसाठी फायदेशीर ठरणारी असल्याचे नगर विकास मंत्री एकनाथ शिंदे (Eknath Shinde) यांनी म्हटले आहे.
नवी मुंबई : सध्याच्या महागाई (Inflation)आणि मंदीच्या काळात सिडकोची परवडणाऱ्या दरातील घरे ही सर्वसामान्य नागरिकांसाठी फायदेशीर ठरणारी असल्याचे नगर विकास मंत्री एकनाथ शिंदे (Eknath Shinde)यांनी म्हटले आहे. सिडकोच्या जानेवारी-2022 गृहनिर्माण योजनेच्या संगणकीय सोडतीचा प्रारंभ एकनाथ शिंदे यांच्या शुभहस्ते ऑनलाइन (Online) पद्धतीने करण्यात आला यावेळी ते बोलत होते. सिडको साकारत असलेल्या आंतरराष्ट्रीय विमानतळासोबतच अन्य अनेक महत्त्वाकांक्षी प्रकल्पांमुळे नवी मुंबईमध्ये घर लाभलेल्या अर्जदारांना घरांमध्ये केलेली गुंतवणूक ही भविष्यात फायदेशीर ठरणार असल्याचे देखील ते यावेळी म्हणाले. तसेच त्यांनी या सोडतीमध्ये घर मिळालेल्या अर्जदारांचे अभिनंदन देखील केले. यावेळी सिडकोचे उपाध्यक्ष तथा व्यवस्थापकीय संचालक डॉ. संजय मुखर्जी यांनी प्रास्ताविकामध्ये गृहनिर्माण योजनेची संक्षिप्त माहिती देत, सिडको सर्वसामान्यांच्या घरांचे स्वप्न पूर्ण करण्यास कटिबद्ध असल्याचे सांगितले.
माजी लोकायुक्तांच्या देखरेखीखाली सोडत
सदर संगणकीय सोडत प्रक्रियेवर देखरेख करण्याकरिता सिडकोतर्फे सुरेश कुमार, माजी लोकायुक्त यांच्या पर्यवेक्षणाखाली समिती नियुक्त करण्यात आली होती. या देखरेख समिती व्यतिरिक्त, अर्जदारांपैकी संतोष पिंपळे, मधुकर पिसाळ आणि राजेश चव्हाण यांनी पंच म्हणून काम पाहिले. सोडतीमध्ये घर लाभलेल्या अर्जदारांनी सिडकोमुळे नवी मुंबईसारख्या सोयी सुविधांनी परिपूर्ण शहरात आपल्या हक्काच्या घराचे स्वप्न पूर्ण झाल्याची भावना यावेळी बोलून दाखवली.
सुरुवातीला 5,730 सदनिकांचा समावेश
महाराष्ट्र शासनाच्या मार्गदर्शनाखाली सिडकोतर्फे 26 जानेवारी 2022 रोजी प्रारंभ करण्यात आलेल्या या योजनेंतर्गत सुरुवातीस 5,730 सदनिका तळोजा नोडमध्ये उपलब्ध करून देण्यात आल्या होत्या. यानंतर अधिकाधिक नागरिकांना योजनेचा लाभ घेता यावा म्हणून द्रोणागिरी, घणसोली, कळंबोली, खारघर आणि तळोजा नोडमधील आणखीन काही रिक्त सदनिकांची भर घालून एकूण 6,508 सदनिका उपलब्ध करून देण्यात आल्या. एकूण 6,508 घरांपैकी 1,905 घरे ही आर्थिकदृष्ट्या दुर्बल घटकाकरिता आणि 4,603 सदनिका ही सर्वसाधारण प्रवर्गाकरिता उपलब्ध करून देण्यात आल्या होत्या. या योजनेस नागरिकांचा उत्तम प्रतिसाद लाभला. जानेवारी-2022 गृहनिर्माण योजनेच्या सोडतीमध्ये यशस्वी ठरलेल्या अर्जदारांची यादी सिडकोच्या lottery.cidcoindia.com या संकेतस्थळावर उपलब्ध करून देण्यात आली आहे.
संबंधित बातम्या
आत लवकरच डेबीट कार्डशिवाय ATM मधून काढता येणार पैसे, गव्हर्नर शक्तिकांत दास यांची मोठी घोषणा
शेअर बाजारातील घसरणीला अखेर आज ब्रेक; सेंसेक्समध्ये 412 अंकाची वाढ, गुंतवणूकदारांना दिलासा
