Vasai-Virar Elections : वसई-विरारमध्ये भाजप उमेदवारांकडून ओवाळणी फंडा, उमेदवारांवर प्रचारात पैसे वाटपाचा आरोप

वसई-विरार महापालिकेत आगामी निवडणुकांच्या प्रचारादरम्यान भारतीय जनता पक्षाच्या (भाजप) उमेदवारांवर गंभीर आरोप झाले आहेत. प्रचारावेळी मतदारांना पैसे वाटण्यासाठी ओवाळणी फंडा वापरण्यात आल्याचा दावा केला जात आहे. या संदर्भात एक व्हिडिओ देखील सोशल मीडियावर मोठ्या प्रमाणात व्हायरल झाला आहे. भाजपचे उमेदवार चंद्रकांत गोरिवले, योगेश सिंग आणि ऋतू सिंग हे घरोघरी जाऊन प्रचार करत असताना महिलांकडून त्यांना ओवाळले जात होते.

नालासोपारा प्रभाग पंधरा अ मधून भाजपचे उमेदवार असलेल्या चंद्रकांत गोरिवले यांनी एका महिलेला ओवाळणी म्हणून पैसे दिल्याचे या व्हिडिओमध्ये स्पष्टपणे दिसत आहे. त्यांच्यासोबत अन्य एका उमेदवारानेही असेच केल्याचा आरोप आहे. या घटनेमुळे राजकीय वर्तुळात खळबळ उडाली आहे. विरोधी पक्षांनी या प्रकारावर तीव्र टीका केली आहे. ही थेट आचारसंहितेचे उल्लंघन करणारी कृती असल्याचा आरोप विरोधकांनी केला आहे. सोशल मीडियावर व्हायरल झालेल्या या व्हिडिओमुळे भाजप उमेदवारांना अडचणींचा सामना करावा लागत आहे, तसेच निवडणूक आयोगाने या प्रकरणाची दखल घ्यावी अशी मागणीही केली जात आहे.