ठाण्याची अवस्था बीडपेक्षाही वाईट! अविनाश जाधवांचा सरकारला इशारा, लवकरच आंदोलनाचा इशारा

अविनाश जाधव यांनी ठाण्यातील कायदा आणि सुव्यवस्थेवर गंभीर प्रश्नचिन्ह उपस्थित केले आहे. त्यांच्या मते, ठाण्याची सद्यस्थिती बीड जिल्ह्यापेक्षाही वाईट आहे. जाधव यांनी तीव्र शब्दांत चिंता व्यक्त करत म्हटले आहे की, जर ठाण्यात गंगाजलसारखी (गुन्हेगारी आणि अराजकतेची) परिस्थिती निर्माण झाली, तर त्यात आश्चर्य वाटण्यासारखे काहीही नसेल. या गंभीर परिस्थितीच्या विरोधात लवकरच आंदोलन छेडणार असल्याचे जाधव यांनी सांगितले. या आंदोलनानंतर महाराष्ट्राला ठाण्याच्या गुन्हेगारीची खरी परिस्थिती काय आहे, याची कल्पना येईल, असा विश्वास त्यांनी व्यक्त केला. यावेळी त्यांनी शिवसेना नेते प्रताप सरनाईक यांच्यावरही टीका केली. सरनाईक शिंदे साहेबांनी सांगितले म्हणूनच चौकशी होते, असे तोऱ्यात सांगतात, असा आरोप जाधव यांनी केला.

शिंदे साहेबच कोणती चौकशी करायची आणि कोणाला बोलावायचे, हे ठरवणार का?, असा सवाल त्यांनी उपस्थित केला. मंत्र्यांना आता अक्कल उरलेली नाही, त्यांना खूप माज आला आहे आणि ते लोकांना गृहीत धरत आहेत, अशी तीव्र प्रतिक्रिया जाधव यांनी दिली. ठाण्याची ग्राउंड लेव्हलला परिस्थिती खूप खराब आहे, असे सांगत त्यांनी भविष्यात मोठ्या समस्यांची शक्यता वर्तवली.