जिल्हा परिषदेत भाजपाचा अध्यक्ष होईल! चंद्रकांत पाटील यांचा विश्वास

भारतीय जनता पार्टीचे नेते चंद्रकांत पाटील यांनी आगामी जिल्हा परिषद अध्यक्षपदाबाबत मोठा दावा केला आहे. ते म्हणाले की, भारतीय जनता पार्टीचाच जिल्हा परिषद अध्यक्ष होईल, हे मी पुन्हा पुन्हा सांगतो. इतर पक्षांच्या अंतर्गत घडामोडींवर भाष्य करणे योग्य नसल्याचे त्यांनी नमूद केले.

राष्ट्रवादी काँग्रेस (अजित पवार गट) च्या नेत्यांनी ‘भीती दाखवल्या’चा आरोप केल्याप्रकरणी पाटील यांनी स्पष्टीकरण दिले. ते म्हणाले की, “मी भीती दाखवली नाही, कारण आमचा व्हिप त्यांना लागू होऊ शकत नाही. गट एकत्र फॉर्म करता येत नाही.” त्यांनी व्हिपच्या नियमावलीबाबत सविस्तर माहिती दिली. पाटील यांनी सांगितले की, जर त्यांच्या गटनेत्याने व्हिप काढला आणि तो तोडला गेला, तर पूर्वीसारखे सोपे राहिलेले नाही. सभागृहात निलंबनाचा नवीन नियम (क्लॉज) लागू झाला आहे. याचा अर्थ, राष्ट्रवादीचा व्हिप तोडला गेल्यास, राष्ट्रवादीचाच गटनेता निलंबनाची कारवाई करेल. “याचा माझ्याशी काय संबंध? मी फक्त कायदा समजावून सांगितला,” असे पाटील यांनी स्पष्ट केले.