अजित पवारांच्या टीकेवर बावनकुळेंचे स्पष्टीकरण, म्हणाले…

महायुतीचे नेते चंद्रशेखर बावनकुळे यांनी महाराष्ट्रातील आगामी निवडणुका आणि राजकीय परिस्थितीवर महत्त्वपूर्ण भाष्य केले आहे. त्यांनी सांगितले की, मुख्यमंत्री देवेंद्र फडणवीस संपूर्ण महाराष्ट्रात रोड शो आणि सभा घेत आहेत. विदर्भ आणि मराठवाड्यापासून ते मुंबई, पुणे, पिंपरी चिंचवडपर्यंत २९ महानगरपालिकांमध्ये त्यांचे दौरे सुरू आहेत. या प्रचारामुळे भाजपा महायुती दोन तृतीयांश बहुमताने विजयी होईल आणि देवेंद्र फडणवीस यांच्या नेतृत्वाखालील विकसित महाराष्ट्रासाठी जनता मतदान करेल, असा विश्वास बावनकुळे यांनी व्यक्त केला.

अजित पवार यांच्या अलीकडील भाजपवरील टीकेवर बावनकुळे यांनी नाराजी व्यक्त केली. समन्वय समितीच्या बैठकीत मित्रपक्षांच्या नेत्यांनी एकमेकांवर टीका न करण्याचे ठरवले होते, असे त्यांनी सांगितले. अजित दादांनी केलेली टीका या निर्णयाच्या विरोधात असून ती योग्य नाही, असे बावनकुळे म्हणाले. मात्र, यामुळे महायुतीमध्ये कोणताही फरक पडणार नाही, परंतु अजित पवार सारख्या व्यक्तिमत्त्वाने टीका-टिप्पणी करणे टाळले पाहिजे, असे आवाहनही त्यांनी केले. संजय राऊत यांनी एकनाथ शिंदे यांना सोबत घेतल्याबद्दल भाजपला पश्चाताप होत असल्याच्या टीकेला बावनकुळे यांनी अर्थहीन ठरवले. महायुती २०२९, २०३५ आणि २०४७ पर्यंत एकत्र राहणार असून, हिंदुत्वाच्या आणि महाराष्ट्राच्या विकासाच्या विचारांवर पुढे जात आहे, असे त्यांनी सांगितले.