Chhatrapati Sambhajianagar: पाच लाखांचा खर्च, अडीच एकरांची मोसंबी बाग वाळली; पाणीटंचाईने शेतकरी संकटात!

छत्रपती संभाजीनगर जिल्ह्यातील गारज शिवारात एका शेतकऱ्याची अडीच एकरांवरील मोसंबीची बाग पाण्याअभावी पूर्णतः वाळून गेली आहे. दोन वर्षांपूर्वी लागवड केलेल्या या बागेसाठी शेतकऱ्याला पाच लाखाहून अधिकचा खर्च करावा लागला होता. विशेष म्हणजे, या मोसंबी बागेतील सोयाबीनच्या आंतर पिकाचेही मोठे नुकसान झाले आहे. नोव्हेंबर महिना सुरू झाला तरीही पावसाने दडी मारल्यामुळे बागेला पाणी मिळाले नाही, परिणामी बाग पूर्णतः वाळून गेली. यामुळे शेतकरी मोठ्या आर्थिक संकटात सापडला असून, त्याला आत्महत्येशिवाय दुसरा पर्याय उरला नाही असे त्याचे म्हणणे आहे.

शेतकऱ्याच्या म्हणण्यानुसार, त्याची पाच वर्षांची एक एकर बाग आणि नवीन दीड एकर बाग अशा एकूण अडीच एकर बागेसाठी आतापर्यंत सात ते आठ लाख रुपये खर्च झाले आहेत. मात्र, दोन्ही बागा आता सुकत आहेत. शासनाने दिवाळीपूर्वी शेतकऱ्यांच्या खात्यावर पाच हजार रुपये जमा करण्याची घोषणा केली होती. मात्र, अद्यापही ते पैसे मिळालेले नाहीत, अशी शेतकऱ्याची तक्रार आहे. विहिरीतील पाणीसाठाही कमी झाल्याने आणि पावसाची कोणतीच चिन्हे नसल्याने शेतकऱ्याची चिंता वाढली आहे.