Eknath Shinde : भाकरी फिरवली नाही तर ती करपते…राज्याला केंद्राकडून मिळणाऱ्या मदतीबद्दल शिंदेंकडून कृतज्ञता

प्रवरानगर, लोणी येथे पद्मश्री डॉ. विठ्ठलराव विखे पाटील आणि पद्मविभूषण डॉ. बाळासाहेब विखे पाटील यांच्या पुतळ्याच्या अनावरण सोहळ्यात एकनाथ शिंदे यांनी केंद्रीय गृहमंत्री अमित शाह यांच्या सहकार क्षेत्रातील योगदानाची प्रशंसा केली. शिंदे म्हणाले की, शाह यांनी सहकार क्षेत्रातील जुन्या समस्या दूर करून त्याला आधुनिकतेकडे नेले आहे.

शिंदे यांनी ‘भाकरी फिरवली नाही तर ती करपते’ या म्हणीचा संदर्भ देत, अमित शाह यांनी सहकार क्षेत्राला स्थिरता आणि विकासाची नवी दिशा दिली असल्याचे अधोरेखित केले. विठ्ठलराव विखे पाटील यांनी महाराष्ट्राला सहकाराचा वारसा दिला आणि बाळासाहेब विखे पाटील यांनी तो शिक्षण, आरोग्य व कृषी क्षेत्रात विस्तारला. याच वारशाला पुढे नेत अमित शाह यांनी दहा हजार कोटींचा आयकर माफ करून साखर उद्योगाला संजीवनी दिली.

इथेनॉल उत्पादनाला चालना दिली आणि ग्रामीण सहकारी बँकांना बळकट केले. राज्यात उद्भवलेल्या पूरस्थितीबद्दल बोलताना शिंदेंनी महाराष्ट्राला केंद्र सरकारकडून मिळणाऱ्या मदतीबद्दल विश्वास व्यक्त केला. पंतप्रधान नरेंद्र मोदींच्या नेतृत्वाखाली केंद्राने महाराष्ट्राला गेल्या काही वर्षांत दहा लाख कोटींहून अधिक निधी दिला असून, सहकारातून आत्मनिर्भर भारताचे स्वप्न साकार करण्याचा निर्धार व्यक्त केला.