शिवरायांशी टिपू सुलतानची तुलना! हर्षवर्धन सपकाळ वादाच्या भोवऱ्यात

काँग्रेसचे प्रदेशाध्यक्ष हर्षवर्धन सपकाळ यांनी टिपू सुलतानची तुलना छत्रपती शिवाजी महाराजांशी केल्याने महाराष्ट्राच्या राजकारणात सध्या तीव्र वाद निर्माण झाला आहे. सपकाळ यांनी टिपूला छत्रपती शिवाजी महाराजांच्या समकक्षेचा मानले पाहिजे, असे वक्तव्य केले. यावर भाजपने आक्रमक भूमिका घेतली असून, मुख्यमंत्री देवेंद्र फडणवीस यांनी सपकाळ यांनी माफी मागावी अशी मागणी केली आहे.

फडणवीस यांच्या टीकेनंतरही सपकाळ यांनी ट्विट करत टिपू सुलतान पराक्रमी आणि स्वराज्यप्रेमी होते, असे म्हटले. छत्रपती शिवाजी महाराजांचा आदर्श घेऊनच टिपू इंग्रजांविरोधात लढले, असा सपकाळ यांचा दावा आहे. त्यांनी भाजपवर इतिहासाबाबत टीका केली. या तुलनेमुळे भाजप आणि हिंदुत्ववादी संघटनांकडून सपकाळ यांच्यावर तीव्र टीका केली जात आहे. टिपू सुलतानने हजारो हिंदूवर अत्याचार केले, मंदिरे लुटली, असा आरोप विरोधकांकडून होत आहे. काँग्रेसने सपकाळ यांच्यावर कारवाई करावी, अशी मागणीही केली जात आहे.

या वादाला मालेगावमधील एका घटनेनेही बळ दिले. मालेगाव महापालिकेच्या नवनिर्वाचित उपमहापौरांच्या दालनात टिपू सुलतानचा फोटो लावण्यात आला होता. यावर हिंदुत्ववादी संघटना आणि शिंदे गटाच्या शिवसेनेने आक्षेप घेतला. मागणीनंतर हा फोटो काढून टाकण्यात आला, परंतु सपकाळ यांच्या विधानामुळे हा मुद्दा अधिकच चिघळला आहे.