Mallikarjun Kharge : पाटण्यातील काँग्रेस कार्यक्रमात नेमकं काय घडलं? मोदींच्या वडिलांवरील वक्तव्याने राजकीय वाद पेटला

मल्लिकार्जुन खरगेंच्या मोदींच्या वडिलांबद्दलच्या वादग्रस्त वक्तव्यामुळे राजकीय वर्तुळात मोठी खळबळ उडाली आहे. पाटण्यामध्ये काँग्रेसच्या एका कार्यक्रमादरम्यान हा प्रकार घडला. कार्यक्रमात काही तरुणांनी गोंधळ घालण्याचा प्रयत्न केला. याच गोंधळ घालणाऱ्या तरुणाला उत्तर देताना काँग्रेस अध्यक्ष मल्लिकार्जुन खरगे यांनी पंतप्रधान नरेंद्र मोदींच्या वडिलांबद्दल एक आक्षेपार्ह विधान केले. त्यांच्या या वक्तव्यामुळे भारतीय जनता पक्ष (भाजप) चांगलाच आक्रमक झाला आहे.

भाजपने या विधानाचा तीव्र शब्दांत निषेध करत मल्लिकार्जुन खरगे यांच्यावर जोरदार टीका केली आहे. भाजपने केवळ टीका करून न थांबता, पाटण्यातील कोतवाली पोलिस ठाण्यात खरगे यांच्याविरोधात लेखी तक्रार दाखल केली आहे. या घटनेच्या निषेधार्थ आणि खरगे यांच्या वक्तव्याविरोधात भाजपने आज देशभर आंदोलनं पुकारली आहेत. देशभरात भाजप कार्यकर्ते या वादग्रस्त वक्तव्याविरोधात निदर्शने करत आहेत. या प्रकारामुळे आगामी काळात राजकीय वातावरण आणखी तापण्याची शक्यता आहे.