मुंबई : मुंबईचे माजी महापौर आणि शिवसेना नेते विश्वनाथ महाडेश्वर (Vishwanath Mahadeshwar) यांना अटक झाली आहे. भाजप नेते किरीट सोमय्या (Kirit Somaiya) यांच्यावर हल्ला झाला होता त्याप्रकरणी महाडेश्वर यांच्यावर ही कारवाई करण्यात आली आहे. खासदार नवनीत राणा (Navneet Rana) आणि आमदार रवी राणा यांना भेटायला किरीट सोमय्या गेले असता त्यांच्या गाडीवर हल्ला झाला होता. यात किरीट सोमय्या जखमी झाल्याचीही माहिती समोर आली होती. त्यानंतर खार पोलिसांनी या प्रकरणाच्या तपासाला वेग आणला होता. यावेळी किरीट सोमय्या यांनी शिवसैनिकांच्या अंगावर गाडी चढवण्याचा प्रयत्न केला असल्याची तक्रारही महाडेश्वर यांच्याकडून करण्यात आली होती. मात्र महाडेश्वर यांची चौकशी झाल्यानंतर त्यांच्याविरुद्ध गुन्हा दाखल करून खार पोलिसांनी विश्वनाथ महाडेश्वर यांना अटक केली आहे.