कर्जाचे हप्ते थकल्याने मायक्रो फायनान्स कंपनीने शेतमजुराचे घर सील, दुष्काळी परिस्थितीमुळे जीवन विस्कळीत
लातूर जिल्ह्यातील ममदापूर येथे दुष्काळी परिस्थितीचा सामना करत असलेल्या शेतमजूर नवनाथ बोयणे यांचे घर इक्विटोस मायक्रो फायनान्स कंपनीने सील केले आहे. अडीच लाखांच्या कर्जाचे हप्ते थकल्याने ही कारवाई करण्यात आली. यामुळे बोयणे कुटुंबीय उघड्यावर आले असून, प्रशासनाने मायक्रो फायनान्स कंपन्यांना सक्तीने वसुली न करण्याच्या सूचना द्याव्यात अशी मागणी होत आहे.
लातूर जिल्ह्यातील ममदापूर येथे एका शेतमजुराच्या घराला मायक्रो फायनान्स कंपनीने टाळे ठोकल्याची धक्कादायक घटना समोर आली आहे. नवनाथ बोयणे या शेतमजुराने घर बांधण्यासाठी इक्विटोस मायक्रो फायनान्स कंपनीकडून अडीच लाखांचे कर्ज घेतले होते. मात्र, सध्या सुरू असलेल्या दुष्काळी परिस्थितीमुळे हाताला काम नसल्याने त्यांना कर्जाचे हप्ते फेडणे शक्य झाले नाही.
हप्ते थकल्याने इक्विटोस कंपनीच्या कर्मचाऱ्यांनी बोयणे कुटुंबीयांना घराबाहेर काढून त्यांचे घर सील केले. यामुळे हे कुटुंब सध्या उघड्यावर आले आहे. दुष्काळी परिस्थितीतही मायक्रो फायनान्स कंपन्यांकडून सुरू असलेल्या सक्तीच्या वसुलीचा मुद्दा यामुळे ऐरणीवर आला आहे. प्रशासनाने मायक्रो फायनान्स कंपन्यांना सक्तीने वसुली न करण्याच्या सूचना द्याव्यात, अशी मागणी होत आहे. बोयणे कुटुंबाला राहण्याची व्यवस्था मिळावी आणि कर्जाचे हप्ते भरण्यासाठी मुदत द्यावी, अशी त्यांची विनंती आहे.
