Malegaon : मालेगाव महापालिका आयुक्त रवींद्र जाधव यांच्यावर ACB ची कारवाई; नेमकं काय घडलं?
नाशिक लाचलुचपत प्रतिबंधक विभागाने मालेगाव महापालिका आयुक्त रवींद्र जाधव आणि उद्यान अधीक्षक निलेश पाटील यांना ताब्यात घेतले. कंत्राटदाराचे बिल काढण्यासाठी चार टक्के लाचेची मागणी केल्याचा त्यांच्यावर आरोप आहे. ही एक मोठी कारवाई असून, मालेगाव प्रशासनात खळबळ उडाली आहे.
नाशिक लाचलुचपत प्रतिबंधक विभागाने (ACB) एक मोठी कारवाई करत मालेगाव महापालिकेचे आयुक्त रवींद्र जाधव यांना ताब्यात घेतले आहे. या कारवाईमुळे प्रशासकीय वर्तुळात मोठी खळबळ उडाली आहे. आयुक्तांसोबतच उद्यान अधीक्षक निलेश पाटील यांनाही एसीबीच्या पथकाने ताब्यात घेतले आहे.
मिळालेल्या माहितीनुसार, कंत्राटदाराचे बिल काढण्यासाठी आयुक्त रवींद्र जाधव आणि उद्यान अधीक्षक निलेश पाटील यांनी चार टक्के लाचेची मागणी केल्याचा गंभीर आरोप आहे. या आरोपानंतर एसीबीने सापळा रचून ही कारवाई केली. लाचेची मागणी करण्यात आल्याची तक्रार आल्यानंतर लाचलुचपत प्रतिबंधक विभागाने याची शहानिशा करून खात्री केली आणि नंतर योग्य नियोजन करून ही कारवाई पार पाडली.
या प्रकरणी अधिक तपास सुरू असून, या कारवाईमुळे भ्रष्टाचारविरोधी मोहिमेला बळकटी मिळाल्याचे बोलले जात आहे. प्रशासनातील मोठ्या पदावर असलेल्या अधिकाऱ्यांवर थेट कारवाई झाल्याने या प्रकरणाचे गांभीर्य अधिक वाढले आहे. एसीबीकडून या संदर्भात पुढील कायदेशीर प्रक्रिया पूर्ण केली जात आहे.
