एकनाथ शिंदेंवरील टीकेने नरेश म्हस्के आक्रमक; थेट पोलिस ठाण्यात तक्रार दाखल

ठाण्याच्या नौपाडा पोलीस ठाण्यात शिवसेना नेते नरेश म्हस्के यांनी विरोधकांविरोधात तक्रार दाखल केली आहे. मुख्यमंत्री एकनाथ शिंदे यांच्यावर आक्षेपार्ह भाषेत टीका केल्याच्या निषेधार्थ ते पोलीस ठाण्यात पोहोचले. विरोधक लोकसभा, विधानसभा आणि महानगरपालिका निवडणुकांमध्ये डिपॉझिट वाचवू शकले नाहीत, त्यांना जिल्ह्यात १० जागाही जिंकता आल्या नाहीत. अशी मंडळी आता एकनाथ शिंदे यांच्यावर चुकीच्या पद्धतीने आरोप करत आहेत आणि शिवीगाळ करत आहेत, असे म्हस्के यांनी म्हटले. आम्ही हे सहन करणार नाही, असे त्यांनी स्पष्ट केले.

पोलिसांकडे सर्व पुरावे सादर करण्यात आले असून, संबंधितांवर गुन्हा दाखल करून त्यांना अटक करण्याची मागणी म्हस्के यांनी केली आहे. जर पोलिसांनी यावर कारवाई केली नाही, तर शिवसैनिक स्वतः न्याय मिळवतील, असा इशारा त्यांनी दिला. कोणत्याही नेत्याबद्दल शिवीगाळ करणे योग्य नाही. या घटनेचे मुंबईत बसून राजकारण केले जात आहे आणि ठाण्यात स्क्रिप्ट पाठवली जात आहे. आम्ही ठाणेकर हे सहन करणार नाही, कारण आम्हीसुद्धा भूमीपुत्र आहोत, असे म्हस्के यांनी सांगितले.