MLC नीकालांनंतर राजकीय चिखलफेक टाळा! महायुतीतील नेत्यांना नरेश म्हस्के यांचे आवाहन

एमएलसी निवडणुकीचा निकाल लागल्यानंतर आता एकमेकांवर चिखलफेक करू नये, असे आवाहन नरेश म्हस्के यांनी केले आहे. प्रदीप पुर्णेकर यांच्या बाबतीत घडलेली घटना अत्यंत दुर्दैवी असल्याचे सांगत, म्हस्के यांनी या हल्ल्याचा तीव्र निषेध केला. प्रदीप पुर्णेकर हे त्यांचे जुने सहकारी असून, त्यांनी अनेक वर्षे एकत्र काम केले आहे. त्यामुळे त्यांच्यावर कोणी हल्ला करण्याचा प्रयत्न करत असेल, तर ते निश्चितच निषेधार्ह आहे, असे म्हस्के म्हणाले. या घटनेचे राजकारण कोणीही करू नये आणि एकमेकांवर चिखलफेक करू नये, असे आवाहन त्यांनी केले.

या संदर्भात सत्यता काय आहे, याचा पोलीस तपास करत आहेत आणि पोलीस योग्य तो तपास करून सत्य जनतेसमोर आणतील, असा विश्वास म्हस्के यांनी व्यक्त केला. त्यांनी या घटनेबाबत मुख्यमंत्री आणि उपमुख्यमंत्र्यांशी संपर्क साधून लवकर तपास व्हावा आणि दोषींना कठोर शिक्षा मिळावी, अशी विनंती केली आहे. निवडणूक झाली असून, निकाल लागला आहे. त्यामुळे सत्य बाहेर येईपर्यंत संयम राखत राजकारण टाळावे, असे मत नरेश म्हस्के यांनी मांडले.