नागपूरच्या निकालावरून नितेश राणे काँग्रेसवर भडकले; 17 हजार बाद मतांवरही उपस्थित केले प्रश्न!

विधानपरिषद निवडणुकीच्या निकालांनंतर महाराष्ट्राचे राजकारण तापले आहे. भाजप नेते नितेश राणे यांनी काँग्रेसवर जोरदार हल्ला चढवला आहे. नागपूर पदवीधर मतदारसंघातील निकालांवर भाष्य करताना राणे यांनी काँग्रेसच्या जल्लोषावर प्रश्नचिन्ह उपस्थित केले. ते म्हणाले, “एक अपक्ष उमेदवार जिंकल्यामुळे काँग्रेसने इतका आनंद साजरा करणे अनाकलनीय आहे. त्यांना स्वतःचे काही साधता येत नाही, म्हणून दुसऱ्याच्या जोरावर ते पेढे वाटत आहेत.” निवडणुकीत मोठ्या प्रमाणात बाद झालेल्या मतांवरही नितेश राणे यांनी चिंता व्यक्त केली.

नागपूरमध्ये जवळपास 16-17 हजार मते अवैध ठरली होती. यावर सर्व राजकीय पक्षांनी गांभीर्याने विचार करण्याची गरज असल्याचे ते म्हणाले. “जर सुशिक्षित मतदारही चुका करत असतील आणि मते बाद होत असतील, तर याची कारणे शोधायला हवीत,” असे राणे यांनी नमूद केले. महायुतीला जनतेने राज्याची सेवा आणि विकास करण्याची संधी दिली आहे, त्यामुळे या निकालांचे योग्य विश्लेषण केले जाईल, असेही त्यांनी स्पष्ट केले.