Pankaja Munde : बीडच्या साडीची जाहिरात करण्यासाठी पंकजा मुंडे रॅम्प वॉक करणार; नेमकं काय म्हणाल्या?

भाजप नेत्या पंकजा मुंडे यांनी बीड जिल्ह्यामध्ये रेशीम उद्योगाला प्रोत्साहन देण्यासाठी रॅम्प वॉक करण्याची तयारी दर्शवली आहे. बीडने तयार केलेली साडी मिळाल्यास त्या स्वतः बीडमध्ये रॅम्प वॉक करतील, असे त्यांनी म्हटले आहे. स्थानिक उद्योजकता, विशेषतः महिलांची उद्योजकता वाढावी आणि त्यांचे उत्पादन वाढावे, हा यामागचा मुख्य उद्देश आहे.

या संदर्भात बोलताना पंकजा मुंडे यांनी स्पष्ट केले की, यापूर्वी मुंबईत केलेला वॉक हा मॉडेल्सचा रॅम्प वॉक नव्हता, तर वॉक फॉर कॉज होता. हँडलूम आणि नव्याने तयार झालेल्या रेशीमला प्रोत्साहन देण्यासाठी विविध उद्योगांचे सीईओ आणि हिरांदानी बिल्डरसारखे मोठे उद्योजक त्यामध्ये सहभागी झाले होते. त्या उपक्रमाला मोठ्या प्रमाणात प्रशंसा मिळाली. त्यामुळे जालन्यासारख्या भागातील रेशीम उत्पादन आणि महिला उद्योजकतेला चालना देण्यासाठी बीडमधून साडी मिळाल्यास पुन्हा रॅम्प वॉक करायला त्यांना कोणतीही हरकत नाही, असे मुंडे यांनी म्हटले आहे. हा प्रयत्न स्थानिक अर्थव्यवस्थेला बळकटी देणारा ठरू शकतो.