Dahi Handi in Mumbai | हजारो तरुणांनी मैदान फुललं! राज सुर्वेंच्या दहीहंडीत बॉलिवूडसह मराठी सेलिब्रिटींची हजेरी; हजारो तरुणाईचा जल्लोष

मुंबईतील मागाठाणे मतदार संघातील देवीपाडा मैदानात नगरसेवक राज सुर्वे यांनी दहीहंडी उत्सवाचे भव्य आयोजन केले होते. या कार्यक्रमाला हजारो तरुणाईने मोठ्या संख्येने उपस्थिती लावली होती, ज्यामुळे मैदानात उभं राहायलाही जागा नव्हती अशी परिस्थिती निर्माण झाली होती. प्रत्येक गोविंदा पथकात प्रचंड उत्साह दिसून येत होता, त्यांच्या महिन्याभराच्या मेहनतीचे चीज आज या ठिकाणी झाल्याचे चित्र होते.

या उत्सवात सहभागी झालेल्या विविध प्रांतातील आणि भाषिक तरुणांना एकत्र आणून मराठी संस्कृतीतील दहीहंडीचा मराठमोळा खेळ खेळायला मिळाला. दहीहंडीच्या माध्यमातून एकीचा संदेश देत, राज सुर्वे यांनी सांगितले की, जसे थर लावण्यासाठी पथकामध्ये एकी आवश्यक असते, त्याचप्रमाणे समाजात एकत्र राहिल्यास आपण नेहमी अव्वल दर्जावर राहू. Gen Z च्या मोठ्या सहभागाबद्दल बोलताना, सुर्वे यांनी त्यांना मराठी संस्कृतीचा अनुभव घेण्याचे आणि मराठी भाषेला जीवनात स्थान देण्याचे आवाहन केले. या प्रसंगी राज सुर्वे यांनी आपण विकासाची आणि युवकांना रोजगार देणारी दहीहंडी फोडणार असल्याचे सांगितले.