Raj Thackeray : तुम्ही Gen Z कधी उठणार? वृक्षतोडीवर राज ठाकरेंचं तरुणांना मोठं आवाहन

कर्जत येथे झालेल्या सभेत महाराष्ट्र नवनिर्माण सेनेचे अध्यक्ष राज ठाकरे यांनी तरुणाईला, विशेषतः ‘जनरेशन झी’ला (Gen Z) वृक्षतोड आणि राजकीय उदासीनतेवर गंभीर प्रश्न विचारले. १९९७ ते २०१२ दरम्यान जन्मलेल्या तरुणांना जनरेशन झी संबोधले जाते, जे केवळ शहरांमध्येच नव्हे तर ग्रामीण महाराष्ट्रातही आहेत, असे ठाकरे म्हणाले. त्यांनी सर्बिया देशाचे उदाहरण दिले, जिथे तरुणांनी हुकूमशहाचे सरकार उलथवून टाकले.

तिथे वृत्तवाहिन्या आणि वृत्तपत्रे बंद करून आंदोलकांना देशद्रोही ठरवले जात होते, परदेशातून निधी मिळत असल्याचा आरोप केला जात होता, पण तरीही तरुणांनी सत्ता बदलली. याउलट, महाराष्ट्रातील तरुण हातावर हात धरून बसले आहेत. “जर तुम्ही थंड आणि शांत बसणार असाल, तर मला तुमचे नेतृत्व करायचे नाही,” अशा शब्दांत त्यांनी आपली नाराजी व्यक्त केली. शिवछत्रपतींच्या महाराष्ट्रात मराठी मावळे म्हणून आपण पेटून उठत नाही, याची खंतही त्यांनी बोलून दाखवली.