खोट्या गुन्ह्यात फडणवीस, शिंदेंना गोवण्याचा प्रयत्न; रश्मी शुक्लांच्या अहवालातून धक्कादायक माहिती समोर

मीरा-भाईंदर येथील एका कथित खोट्या गुन्ह्याच्या प्रकरणात राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांना गोवण्याचा प्रयत्न झाला असल्याचा एक महत्त्वपूर्ण अहवाल समोर आला आहे. तत्कालीन पोलीस अधिकारी रश्मी शुक्ला यांनी निवृत्तीच्या केवळ पाच दिवस आधी हा अहवाल राज्य सरकारला सादर केला होता. या अहवालात काही पोलीस अधिकाऱ्यांवर गंभीर स्वरूपाचे गुन्हे दाखल करण्याची शिफारस करण्यात आली आहे.

या अहवालातील माहितीनुसार, तत्कालीन माजी पोलीस महासंचालक संजय पांडे यांच्यावर गुन्हा दाखल करण्याची शिफारस करण्यात आली आहे. याच अहवालात पोलीस उपायुक्त लक्ष्मीकांत पाटील आणि एसीपी सरदार पाटील या तिघांवरही मीरा-भाईंदरमधील संबंधित खोट्या गुन्ह्याच्या प्रकरणात कारवाई करण्याची शिफारस नमूद आहे. फडणवीस आणि शिंदे यांना या कथित बनावट प्रकरणात अडकवण्याचे प्रयत्न झाल्याचा दावा या अहवालाद्वारे करण्यात आला आहे. या अहवालाने महाराष्ट्राच्या राजकारणात मोठी खळबळ उडवून दिली असून, यातील शिफारशींवरून आगामी काळात काय घडामोडी होतात, याकडे सर्वांचे लक्ष लागले आहे.