पुणे : नगर पंचायत निवडणुकीत (Nagar Panchayat Election) भाजपला सर्वाधिक जागा मिळाल्या. तर सर्वाधिक 28 नगर पंचायतींवर राष्ट्रवादी काँग्रेसनं वर्चस्व मिळवलं आहे. या सगळ्यात नगर पंचायत निवडणूक गाजवली ती दिवंगत माजी गृहमंत्री आर.आर. पाटील यांचा मुलगा रोहित पाटीलने (Rohit Patil). अवघ्या 23 वर्षाच्या या उमद्या पोरानं स्वकियांसह विरोधकांनाही धोबीपछाड देत कवठे-महाकाळ नगर पंचायत आपल्या ताब्यात मिळवली. त्यामुळे राजकीय वर्तुळात आणि सर्वसामान्यांच्या तोंडावर सध्या रोहित पाटील यांचंच नाव आहे. अशावेळी रोहित पाटील यांना पक्षाकडून मोठी जबाबदारी दिली जाण्याचे संकेत आमदार रोहित पवार (Rohit Pawar) यांनी आज दिले आहेत. तसेच गोव्यात राष्ट्रवादी आणि शिवसेनेची युती जवळपास निश्चित असल्याचेही रोहित पवारांनी सांगितेले आहे.