Samruddhi Highway : समृद्धी महामार्गावर दरोडेखोरांचा धुमाकूळ; सहा महिन्यांत 8 वेळा दगडफेक, 5 वेळा लुटमार; प्रवाशांमध्ये भीती

समृद्धी महामार्गावर वाढत्या गुन्हेगारीमुळे प्रवाशांची सुरक्षा धोक्यात आली आहे. टोळक्यांकडून वाहनांवर दगडफेक करून लुटमार करण्याच्या घटना सातत्याने घडत आहेत. गेल्या सहा महिन्यांत, नागपूर-मुंबईला जोडणाऱ्या या महत्त्वाकांक्षी महामार्गावर आठ वेळा दगडफेकीचे प्रकार घडले आहेत, तर पाच वेळा लुटमार करण्यात आली आहे. यामुळे समृद्धी महामार्गावरून प्रवास करणे असुरक्षित बनल्याचे चित्र आहे.

दहशत माजवण्याच्या या घटना थांबण्याची चिन्हे नाहीत. नुकतीच, छत्रपती संभाजीनगर जिल्ह्यातील करमाड परिसरात नागपूरच्या दिशेने जाणाऱ्या दोन वाहनांवर सहा ते सात जणांच्या टोळक्याने दगडफेक केली. या हल्ल्यामुळे वाहनांच्या काचा फुटल्या आणि चालकांमध्ये भीतीचे वातावरण पसरले. विशेष म्हणजे, पोलिसांना याची माहिती मिळेपर्यंत हल्लेखोर फरार झाले होते. दोन दिवसांपूर्वीच एका अभियंत्याला पिस्तुलाचा धाक दाखवून लुटल्याची घटना ताजी असतानाच ही नवी दगडफेकीची घटना घडली आहे. समृद्धी महामार्गावर वावरणाऱ्या या दरोडेखोरांना पकडणे हे पोलिसांसमोर मोठे आव्हान आहे. प्रवाशांच्या सुरक्षिततेसाठी कठोर उपाययोजना करण्याची मागणी होत आहे.