ZP Election Sangli : सांगली बलगडवेमध्ये ग्रामस्थांचा मतदानावर बहिष्कार
सांगली जिल्ह्यातील तासगाव तालुक्यातील बलगडवे गावातील ग्रामस्थांनी जिल्हा परिषद निवडणुकीवर बहिष्कार टाकला आहे. एका खासगी कंपनीने सौर ऊर्जा प्रकल्पाच्या नावाखाली केलेल्या अनधिकृत वृक्षतोडीमुळे नागरिक संतप्त झाले आहेत. जोपर्यंत मागण्या मान्य होत नाहीत, तोपर्यंत बहिष्कार मागे घेणार नाही, अशी त्यांची भूमिका आहे.
सांगली जिल्ह्यातील तासगाव तालुक्यातील बलगडवे गावामध्ये जिल्हा परिषद निवडणुकीदरम्यान ग्रामस्थांनी मतदानावर बहिष्कार टाकल्याची माहिती समोर आली आहे. एका खासगी कंपनीने सौर ऊर्जा प्रकल्पाच्या नावाखाली अमाप आणि अनधिकृत वृक्षतोड केल्याच्या निषेधार्थ गावकरी एकवटले आहेत. सकाळी साडेसात वाजल्यापासून मतदान प्रक्रिया सुरू झाली असली, तरी बलगडवे येथील दोन्ही मतदान केंद्रांवर एकही मत नोंदवले गेलेले नाही.
ग्रामस्थांनी केवळ मतदानावर बहिष्कार टाकला नसून, गावही बंद ठेवले आहे. सकाळी मतदान केंद्रावरील अधिकारी आणि कर्मचारी मतदारांची वाट पाहत बसले होते, तर दुसरीकडे गावातील सर्व ग्रामस्थ एका ठिकाणी जमून शासनाचे लक्ष वेधण्याचा प्रयत्न करत होते. जोपर्यंत राज्य सरकार आणि जिल्हा प्रशासन त्यांच्या मागण्या मान्य करत नाही, तोपर्यंत मतदानावरचा बहिष्कार उठवला जाणार नाही, अशी ठाम भूमिका ग्रामस्थांनी घेतली आहे. वृक्षतोडीमुळे पर्यावरणाची हानी होत असल्याचा आरोप करत ग्रामस्थांनी प्रशासनाकडे त्वरित कारवाईची मागणी केली आहे.
