Sharad Pawar : सुनेत्रा पवारांच्या शपथविधीबाबत मला माहिती नाही – शरद पवार

अजित पवारांच्या निधनानंतरच्या राजकीय घडामोडींवर शरद पवारांनी आपली भूमिका स्पष्ट केली. सुनेत्रा पवारांच्या गटनेते पदाचा स्वीकार आणि उपमुख्यमंत्री पदाच्या शपथविधीबाबत सुरू असलेल्या चर्चांवर पवारांनी प्रतिक्रिया दिली. “याबद्दल मला काहीही माहिती नाही. मी केवळ वृत्तपत्रांमध्येच या बातम्या वाचतो. शपथविधीला आम्हाला जायचे नाही,” असे त्यांनी स्पष्ट केले. पक्षातील जयंत पाटील, सुनील तटकरे आणि प्रफुल्ल पटेल यांच्यासारख्या नेत्यांना निर्णय घेण्याचा अधिकार आहे, असे नमूद करत शरद पवारांनी या घडामोडींवर थेट भाष्य करणे टाळले. अजित पवारांच्या निधनाने पक्षाला मोठा धक्का बसल्याचे त्यांनी म्हटले. अजित दादा हे निवडणुकांची जबाबदारी सांभाळत होते आणि आज ते असते तर फिल्डवर काम करत असते, असेही त्यांनी सांगितले. भविष्यात पक्षाची वाटचाल कशी असेल, या प्रश्नावर शरद पवारांनी, “आमची नवी पिढी यावर लक्ष केंद्रित करेल,” असे सांगितले. तसेच, राष्ट्रवादी काँग्रेसच्या दोन्ही गटांच्या एकत्रीकरणाबाबतच्या चर्चा माझ्या कानावर आल्या नाहीत, असेही त्यांनी नमूद केले.