शरद पवारांचा गट NDAच्या वाटेवर? थेट अमित शाहांसोबतच… पडद्याआड मोठ्या राजकीय हालचाली!

केंद्रीय गृहमंत्री अमित शहा यांच्यासोबत झालेल्या दोन स्वतंत्र भेटींमुळे महाराष्ट्राच्या राजकारणात नव्या चर्चांना सुरुवात झाली आहे. राष्ट्रवादी काँग्रेसच्या दोन्ही गटांतील नेत्यांनी या भेटी वेगवेगळ्या कारणांसाठी झाल्याचे सांगितले असले, तरी राजकीय वर्तुळात विविध शक्यता व्यक्त केल्या जात आहेत.

राष्ट्रवादी (शरद पवार) गटाच्या खासदार सुप्रिया सुळे यांनी बीडचे खासदार बजरंग सोनवणे यांच्यासह अमित शहा यांची भेट घेतली. १० ऑगस्ट रोजी दिल्लीत होणाऱ्या रेवती सुळे यांच्या रिसेप्शन सोहळ्याचे निमंत्रण देण्यासाठी ही भेट झाल्याचे त्यांनी सांगितले. यावेळी खासदार बजरंग सोनवणे यांनी बीड मतदारसंघातील कायदा व सुव्यवस्थेचा मुद्दा केंद्रीय गृहमंत्र्यांसमोर मांडल्याचे स्पष्ट केले आहे.

दुसरीकडे, राष्ट्रवादी (अजित पवार) गटाचे प्रदेशाध्यक्ष सुनील तटकरे यांनीही अमित शहा यांची स्वतंत्र भेट घेतली. या दोन्ही भेटींनंतर राज्यात नव्या राजकीय घडामोडींच्या चर्चांना वेग आला आहे. मात्र, संबंधित नेत्यांनी या भेटींना राजकीय स्वरूप नसल्याचे स्पष्ट केले असून, आगामी काळात या चर्चांवर काय पडदा उठतो याकडे सर्वांचे लक्ष लागले आहे.