राज्यसभा निवडणूक बिनविरोध, 7 उमेदवार थेट खासदार! अडसूळ मात्र नाराज
महाराष्ट्रातील राज्यसभा निवडणूक बिनविरोध झाली असून सात जागांसाठी सातच उमेदवार निवडून आले आहेत. यामध्ये शरद पवार, पार्थ पवार, रामदास आठवले आणि ज्योती वाघमारे यांचा समावेश आहे. निवडणुकीच्या या प्रक्रियेत शिंदे गटातील नाराजी तसेच कुटुंबातील दोन सदस्य राज्यसभेत जाण्याचा योग जुळला. यामुळे मतदानाची आवश्यकता टळली.
महाराष्ट्रातील राज्यसभेच्या सात जागांसाठीची निवडणूक अखेर बिनविरोध पार पडली आहे. सत्ताधारी आणि विरोधकांनी केवळ सातच उमेदवार रिंगणात उतरवल्यामुळे मतदानाची आवश्यकता राहिली नाही. यामुळे महाराष्ट्रातील घोडेबाजार टळल्याचे बोलले जात आहे.
या निवडणुकीत भारतीय जनता पक्षाकडून रामदास आठवले, विनोद तावडे, माया इवनाते आणि रामराव वडकुते हे निवडून आले. एकनाथ शिंदे यांच्या नेतृत्वाखालील शिवसेनेने डॉ. ज्योती वाघमारे यांना संधी दिली, तर राष्ट्रवादी काँग्रेस पक्षाच्या अजित पवार गटाकडून पार्थ पवार यांना प्रथमच राज्यसभेवर पाठवण्यात आले आहे. महाविकास आघाडीकडून ज्येष्ठ नेते शरद पवार पुन्हा एकदा राज्यसभेवर गेले आहेत.
या बिनविरोध निवडीमुळे काही राजकीय घडामोडी समोर आल्या. राहुल शेवाळे यांच्याऐवजी डॉ. ज्योती वाघमारे यांना उमेदवारी मिळाल्याने आनंदराव अडसूळ यांनी नाराजी व्यक्त केली आहे. शरद पवार यांच्या विनंतीमुळेच अतिरिक्त उमेदवार दिला नसल्याचे उपमुख्यमंत्री एकनाथ शिंदे यांनी सांगितले.
