अभिनेत्री शिल्पा शेट्टीच्या घरी बाप्पाचे आगमन, नवनीत राणांनी घेतले दर्शन; खास सजावटीने वेधले लक्ष!

अभिनेत्री शिल्पा शेट्टीच्या घरी आयोजित गणेशोत्सवात खासदार नवनीत राणा यांनी बाप्पाचे दर्शन घेतले. शिल्पा शेट्टीच्या घरी दरवर्षीप्रमाणेच यंदाही मोठ्या उत्साहात गणेशाचे आगमन झाले आहे. यावेळी नवनीत राणा यांनी शिल्पा शेट्टीच्या गणेशोत्सवाच्या तयारीचे आणि तिच्या बाप्पावरील निस्सीम श्रद्धेचे कौतुक केले. शिल्पा शेट्टीने यावेळी बोलताना सांगितले की, ती स्वतः दक्षिण भारतीय असली तरी महाराष्ट्राची मुलगी आहे. तिच्या घरी पंजाबी आणि दक्षिण भारतीय संस्कृतीचा संगम गणेशोत्सवात दिसून येतो.

विघ्नहर्ता बाप्पाने सर्वांचे विघ्न दूर करावे, अशी प्रार्थना तिने यावेळी केली. दरवर्षी स्वतःच सजावटीची कल्पना करते, असेही शिल्पाने सांगितले. यंदा तिरुपती बालाजीच्या देखाव्याची प्रेरणा घेऊन तिने सजावट केली होती. बाप्पावरील श्रद्धा केवळ एका दिवसाची नसते, तर ती निरंतर असावी आणि दररोज बाप्पाचे स्मरण केले पाहिजे, असे मत शिल्पा शेट्टीने व्यक्त केले.