Turmeric Crop: वाढत्या उन्हाचा असा ‘हा’ परिणाम, हळद काढणी दिवसा अन् रात्रीतून प्रक्रिया
आतापर्यंत अवकाळी पाऊस, ढगाळ वातावरणाचा परिणाम पिकांवर झाला होता. पीक काढणीनंतर सर्वकाही संपले असे नाही. कारण अनियमित पावसाने उसंत घेतली असली तरी मराठवाड्यात उन्हाचा पारा हा वाढतच आहे. सध्या नांदेडसह हिंगोली, परभणी जिल्ह्यामध्ये हळद काढणीची कामे जोमात सुरु आहेत. काढणीनंतर हळद पक्की बनवण्यासाठी शिजवणे गरजेचे आहे.
नांदेड : आतापर्यंत अवकाळी पाऊस, ढगाळ वातावरणाचा परिणाम पिकांवर झाला होता. पीक काढणीनंतर सर्वकाही संपले असे नाही. कारण अनियमित पावसाने उसंत घेतली असली तरी (Marathwada) मराठवाड्यात उन्हाचा पारा हा वाढतच आहे. सध्या नांदेडसह हिंगोली, परभणी जिल्ह्यामध्ये (Turmeric Harvesting) हळद काढणीची कामे जोमात सुरु आहेत. काढणीनंतर हळद पक्की बनवण्यासाठी शिजवणे गरजेचे आहे. पण सध्या (Temperature Increase) उन्हाच्या झळा शेतकऱ्यांना सहन होत नसल्याने हळदीवर रात्रीतून प्रक्रिया केली जात आहे. त्यामुळे दिवसा काढणी कामे आणि रात्रीतून हळद शिजवणे असा प्रकार सध्या शेतशिवारात पाहवयास मिळत आहे.
अशी आहे हळद शिजवण्याची पध्दत
हळद काढणीनंतर पक्की बनवण्यासाठी ती शिवजवणे गरजेचे आहे. वाफेवर ही हळद शिजवण्यासाठी कुक्कर लावला जातो. या कुकरला जळतन घालून निर्माण होणाऱ्या वाफेवर ही हळद शिजवली जाते. याकरिता शेतकऱ्यांना रात्र-रात्र जागून काढावी लागत आहे. शिवाय ही प्रक्रिया केल्याशिवाय हळद पक्की होतच नाही. उन्हापासून बचावासाठी सायंकाळी 6 नंतर शेतकरी वाफेची भट्टी सुरु करीत आहेत. 2 तासानंतर वाफ तयार होण्यास सुरवात होते आणि त्या वाफेवर ही प्रक्रिया केली जाते.
पाण्यासाठीही भटकंती
नांदेड जिल्ह्यातील अधिकतर क्षेत्रावरील हळद काढणीची कामे झाली आहेत. आता हळद शिजवण्यासाठी शेतशिवारात भट्ट्या पेटल्या आहेत पण ही प्रक्रिया पूर्ण करण्यासाठी आवश्यक असलेल्या पाण्यासाठी भटकंती करावी लागत आहे. कारण जिल्ह्यात अघोषित भारनियमन सुरु झाले आहे. ग्रामीण भागात अवेळी बत्तीगुल होत असल्याने शेतकऱ्यांची पाण्यासाठी भटकंती सुरु आहे. मात्र, सध्याचा विक्रमी दर पदरी पाडून घेण्यासाठी दिवसभर काढणी कामे आणि रात्रीतून ही प्रक्रिया केल्याशिवाय पर्याय नसल्याचे शेतकऱ्यांचे म्हणणे आहे.
उत्पादन घटले, शेतकरी कष्टाचाच धनी
हळद पीक जोमात असतानाच मराठवाड्यात अवकाळी पावसाने हजेरी लावली होती. हळद क्षेत्रामध्ये पाणी साचून राहिल्याने कंद सडले गेले. अनेक दिवस पाण्याचा निचराच झाला नसल्याने ही परस्थिती ओढावली होती. आता खराब अवस्थेतील पीक शेतकऱ्यांच्या पदरी पडत आहे. शिवाय वाढत्या उन्हामुळे दिवसा हळद शिजवण्याची प्रक्रिया शक्य नसल्याने रात्री भट्ट्या पेटवल्या जात आहेत. हे कमी म्हणून की काय आता भारनियमन सुरु झाल्याने हळद शिजवण्यासाठी आवश्यक असलेल्या पाण्याचाही प्रश्न निर्माण झाला आहे.
संबंधित बातम्या :
