मुकेश अंबानींचा ताज गेला… गौतम अदानी बनले आशियातील सर्वात श्रीमंत व्यक्ती, या कारणामुळे संपत्ती वाढली

मुकेश अंबानी आणि गौतम अदानी हे भारतातील दोन दिग्गज उद्योगपती आहेत. दोघांमध्ये नेहमी श्रीमंतीच्या बाबतीत स्पर्धा सुरू असते. अशातच आता श्रीमंतांच्या यादीत पुन्हा एकदा मोठा उलटफेर झाला आहे. गौतम अदाणी यांनी मुकेश अंबानी यांना मागे टाकत आशियातील सर्वात श्रीमंत व्यक्तीचा मान मिळवला आहे. ताज्या क्रमवारीनुसार, गौतम अदानी यांची एकूण संपत्ती 92.6 अब्ज डॉलरपर्यंत पोहोचली आहे, तर मुकेश अंबानी यांची संपत्ती 90.8 अब्ज डॉलर इतकी आहे. संपत्तीतील या वाढीमुळे अदानी आता केवळ भारतातच नव्हे तर संपूर्ण आशियात सर्वात श्रीमंत व्यक्ती ठरले आहेत.

अदानींची संपत्ती का वाढली?

समोर आलेल्या माहितीनुसार, अदानी समूहाच्या शेअर्समध्ये अलीकडे मोठी वाढ दिसून आली आहे. बंदरे, ऊर्जा आणि पायाभूत सुविधा (इन्फ्रास्ट्रक्चर) क्षेत्रांमधील कंपन्यांवर गुंतवणूकदारांचा विश्वास वाढत आहे. याच कारणामुळे अदानी समूहाच्या बाजारमूल्यात अब्जावधी डॉलरची वाढ झाली असून त्याचा थेट परिणाम अदानी यांच्या संपत्तीत दिसून आला आहे. यात कारणामुळे अदानी आशियातील सर्वात श्रीमंत व्यक्ती बनले आहेत.

अंबानींची वाढ मर्यादित

रिलायन्स इंडस्ट्रीजचे अध्यक्ष मुकेश अंबानी यांच्या संपत्तीतही वाढ झाली आहे, मात्र ती अदानी यांच्या तुलनेत कमी आहे. रिलायन्स इंडस्ट्रीजचा व्यवसाय तेल-गॅस, दूरसंचार आणि किरकोळ (रिटेल) क्षेत्रांमध्ये पसरलेला असला तरी अलीकडच्या काळात त्याच्या वाढीचा वेग कमी राहिला आहे. त्यामुळे अदानींना अंबानींना मागे टाकले आहे.

जागतिक क्रमवारीत कितव्या स्थानी?

ब्लूमबर्गच्या क्रमवारीनुसार, गौतम अदानी सध्या जगातील सर्वात श्रीमंत व्यक्तींच्या यादीत 19व्या स्थानावर आहेत. या यादीत पहिल्या क्रमांकावर एलॉन मस्क आहेत, ज्यांची संपत्ती 656 अब्ज डॉलर आहे. तर लॅरी पेज 286 अब्ज डॉलर संपत्तीसह दुसऱ्या आणि जेफ बेझोस 269 अब्ज डॉलर संपत्तीसह तिसऱ्या स्थानावर आहेत.

दरम्यान, अदानी आणि अंबानी यांच्यात सर्वात श्रीमंत व्यक्तीसाठी गेल्या काही वर्षांपासून स्पर्धा सुरू आहे. 2022 मध्ये अदानी यांनी पहिल्यांदा अंबानींना मागे टाकले होते, पण हिंडेनबर्गच्या अहवालानंतर अदानी समूहाच्या शेअर्समध्ये घसरण झाली आणि अंबानी पुन्हा अव्वल स्थानावर पोहोचले होते. मात्र, आता पुन्हा गौतम अदानी यांनी पहिला क्रमांक पटकावला आहे.