Gold-Silver Rate Today 5 February 2026 : विचारात वेळ नका घालवू , सोन्या-चांदीच्या किंमतीत पुन्हा भूकंप, पटापट जाणून घ्या दर आणि दुकानात घ्या धाव

Gold Silver Rate Today : गेल्या अनेक महिन्यांपासून सातत्याने वाढणारं सोन-चांदी आता आपल्या बजेटबाहेर गेलंय, आता फक्त दुकानातलांबून सोन्याचे दागिने बघायचे. खरेदीचा विचारही नको.. अशीच भावना सर्वसामान्य ग्राहकांची होती. मात्र मार्केट कधीच सेम नसतं, चढ-उतार होतच राहतात. याचा प्रत्यय गेल्या काही दिवसांपासून येत असून सोनं-चांदीच्या दरात चांगलीच घसरण पहायला मिळत आहे. घसरणीचा हा ट्रेंड आजही कायम असून आज ( 5 फेब्रुवारी 2026) सकाळी मार्केट उघडताच मोठा भूकंप झालाय. MCX वर ( मल्टी कमोडिटी एक्सचेंज ऑफ इंडिय) बाजार उघडताच सोनं-चांदीचे दर झर्रकन खाली आलेत. देशांतर्गत बाजारपेठ आणि आंतरराष्ट्रीय बाजारपेठेत सोने आणि चांदीच्या किमतीत मोठी घसरण झाली.

स्पॉट गोल्ड जवळजवळ 2.5 टक्क्यांनी घसरले आणि प्रति औंस 5 हजार डॉलर्सपेक्षा जास्त टिकू शकले नाही, ते4.850.16 डॉलर्स प्रति औंसवर घसरले. दरम्यान, चांदीमध्ये लक्षणीय घट झाली आणि दर 14 टक्क्यांनी सुळकन खाली घसरले. आता चांदी 88.965 डॉलर प्रति औन्सवरून 75.386 डॉलरपर्यंत घसरली आहे.

MCX वर काय झाले हाल ?

आंतरराष्ट्रीय बाजाराव्यतिरिक्त, एमसीएक्सवरही (MCX) सोनं आणि चांदीच्या किमतीत मोठी घसरण झाली. गोल्ड एप्रिल फ्यूचर्सचा भाव जवळपास 3 टक्क्यांनी घसरून प्रति ग्रॅमसाठी 1,48,455 इतका झाला. तर सिल्व्हर मार्च कॉन्ट्रॅक्ट 9 टक्क्यांनी घसरून प्रति किलो 2,44,654 रुपये झाला. याचा अर्थ सोने एकाच दिवसात 4 हजार रुपयांपेक्षा जास्त स्वस्त झाले, तर चांदी 24000 रुपयांनी घसरली आहे.

किरकोळ किमतीतही घसरण

किरकोळ बाजारात सोने आणि चांदीच्या किमतीही घसरल्या. बुलियन वेबसाइटनुसार, सोने 2110 रुपयांनी घसरून 1, 51,460 रुपये प्रति १० ग्रॅम झाले. तर चांदी 25, 990 रुपयांनी घसरून 2,45,490 रुपये प्रति किलो झाली.

मोठी घसरण का ?

बाजारातील तज्ज्ञांच्या मते, भू-राजकीय तणाव कमी झाल्यामुळे आणि अमेरिका आणि इराणमधील चर्चेच्या बातम्यांमुळे सुरक्षित गुंतवणुकीची मागणी कमी झाली आहे. रॉयटर्सच्या वृत्तानुसार, ओमानमध्ये दोन्ही देशांमधील चर्चा होण्याची शक्यता आहे, ज्यामुळे गुंतवणूकदारांचा कल धोकादायक मालमत्तेकडे वाढला आहे. दरम्यान, डॉलर निर्देशांक मजबूत झाल्याने मौल्यवान धातूंवर परिणाम झाला. डॉलर 0.20 टक्क्यांनी वाढून 97.81 वर पोहोचला, ज्यामुळे परदेशी गुंतवणूकदारांसाठी सोने आणि चांदी महाग झाली.